Luvusa iminjunju udaba lwamaholo
KUYINSAKAVUKELA umchilo wesidwaba ukuzwa abantu abasebenzayo bekhala ngemiholo yabo.
Esikhathini esiningi abantu bahlale bekhala ngokuthi bahola amakinati emisebenzini abayenzayo, bambalwa abazigqaja ngokuthi bahola kahle futhi bagculisekile.
Iningi labasebenzayo likhononda ngokuthi lihola kancane kangangokuba lize lithungathe eminye imisebenzi ngenhloso yokuthola okuthe xaxa.
Eqinisweni abantu abazazi bakuliphi izinga ngokwemiholo kanti abanye bagcina sebamukela “amakinati” ngenxa yokuntuleka kwemisebenzi eNingizimu Afrika.
Kubalekile ukuba uma usebenza wenze ucwaningo ngomkhakha okuwona nangendlela okuholelwa ngayo. Ukungazi ngeholo elikufanele kungakwenza ugcine usuthatha noma yini. Lokho kungakwenza ugcine ungasawukhonzile umsebenzi wakho.
Udaba lwemiholo luvusa iminjunju kubantu abaningi kangangokuba abanye baze bazonde nokubheka ama- payslip abo kanti uma kwenzeka bewabheka bawabhekela ehontshi.
Nakuba ngingeke ngijaje ngendlela abantu abasebenzisa ngayo imali, kodwa ucwaningo seluveze ukuthi okwenza iningi lezisebenzi likhononde ngemiholo yalo yingenxa yezinga lempilo abantu abayiphilayo.
Ucwaningo lweForbes.com luveze ukuthi iningi labantu liphila impilo engaphezulu futhi engahambisani nemiholo yalo. Abanye baze bazifake kwingcindezi yokufuna ukuzifanisa nozakwabo emsebenzini bengawazi amaphakethe abo. Ukwenza umsebenzi ofanayo nozakwenu akuchazi ukuthi nizo- hola imali efanayo. Ziningi izindlela ezisetshenziswa yizinkampani ngaphambi kokuba zithathe izinqumo ngesamba somholo wakho.
Phakathi kwazo yisipiliyoni sakho, yimfundo yakho, yisimo sezimali saleyo nkampani. Ngakho kuhle ukubheka ezakho izidingo futhi zihambisane nomholo wakho ngaphandle uma unebhizinisi eliseceleni elaziwayo emsebenzini nelingakuphazamisi ukusebenza kwakho.
Kuhle ukuba abantu bafunde ukuzikhulumela nabaphathi kungaze kufinyelele ekudembeseleni kugcine sekunesiteleka. Iziteleka zidlangile eNingizimu Afrika ngenxa yokwehluleka ukufinyelela ezivumelwaneni kwezinyunyana, izisebenzi nezikhulu zezinkampani. Imvamisa iziteleka zidalwa wudaba lwemiholo nokungagculiseki emsebenzini.
Ezinye izinkampani seziqale uhlelo ezilubiza nge- performance review okuyilona olucacisa ngemali okumele ukhushulelwe ngayo. Lolu hlelo lubheka ukusebenza kwakho nokunye ngaphambi kokuba unyuselwe inkece.
Ukungazi ukuthi uzakwenu uhola malini kwenza kube lula ukuba izinkampani zidlale ngabantu zibaholele kancane.