Nasemkipitweni kunemithetho yakhona
UKUHLALA nomuntu othandana naye ningakashadi futhi ningakakulungeli lokho kungona ubudlelwano benu mhlawumbe obekungaphetha kahle ukuba aniphuthumanga ukukipita.
Kuhle nje ukuba abantu abathandanayo balinde isikhathi esifanele lapho bobabili sebekulungele ukuhlala ndawonye.
Kuyiqiniso elingephikwe ukuthi phambilini abantu besifazane bebengalingani nabesilisa, owesilisa ubethathwa ngokuthi nguye oshaya umthetho, owesifazane athobele lowo mthetho.
Esikhathini samanje sekunzima kwabanye ukuhlala ndawonye ikakhulukazi uma ningakakhuli ngokwanele. Isisho sesiZulu sithi “Izinkunzi ezimbili kazikhonyi esibayeni esisodwa”. Lokho kusho ukuthi, kumele kubekhona ozogoba uphondo ukuze nikwazi ukuhlalisana. Nakhu-ke la engiya khona, uma unesifiso sokuhlala nomuntu kubalulekile ukuba ukulungele lokho ngoba ziningi izinselelo eziba khona. Lezo zinselelo uma ningazilindele, kungabhidlika ubudlelwano.
USomizi Mhlongo ohlelweni lwakhe oludlala kuMzansi Magic, uthe uthando luyafana nendlu. Uma ungakakulungeli ukuba nomuzi, kungcono ukhokhe irenti ukuze uma ungasathandi ukuhlala lapho uhambe uyoqasha kwenye indawo. Kodwa uma usukulungele ukuhlala ungantunti kungcono uwuthenge ngaleso sikhathi umuzi.
Lokhu kusho ukuthi uma ungakakulungeli ukuhlala ngaphansi kwemithetho ethize, ungalinge ukhethe ukuyohlala nomuntu. Kodwa uma usukulungele ukuhlala ngaphansi kwemithetho ethize, usungasithatha isinqumo sokuhlala nomuntu wakho. Nokho ngalokhu kasikhuthazi ukuba abantu bakipite kodwa iqiniso wukuthi umkipito yinto ekhona, ngakho ngeke sikubalekele.
Kuyiqiniso futhi ukuthi abanye abantu bahlala nezithandwa zabo ngoba bebalekela imithetho yasekhaya. Okumele ukuqonde-ke wukuthi kawukho umuzi ongenawo umthetho wakhona, ngisho ngabe nihlala nibabili nje vo, kodwa umthetho ukhona kulowo muzi.
Ozothi ubalekela umthetho kini, uvele uwufice uqine kakhulu phambili. Into engcono wukuba uma usuzibona ukuthi usukhulile, usuyindoda noma uyintombi, usungakwazi ukuzimela uthole indawo yakho wedwa, umuntu wakho umvakashele ngezikhathi ezithize.
Kuyothi-ke uma senazana kahle, senivuthiwe, senikulungele ukuhlala ndawonye bese niyicabanga leyo eyokuhlala ndawonye. Yinto esingeke siyibalekele ukuthi othandweni kuba khona okuba sengathi uphethe omunye noma ofuna ukuphatha.
Yizimo lezo okufanele sizilindele futhi sizilungiselele uma singena ebudlelwaneni. Qaphela ungadakwa uthando ugcine usukipita ungakawulungeli umkipito.