BAZIMISELE UKUBUYA NESICOCO KOWE-ONE'S AND TWO'S
BASIFUNA KwaZulu-Natal okokuqala ngqa isicoco somncintiswano i-One’s and Two’s.
UNhlakanipho Dlamini (DJ Nastro) noBonginhlanhla Mlambo (DJ Butter) bathi bafuna ukubuya naso lesi sicoco esingakaze size kulesi sifundazwe. Laba bobabili bathi noma bengeke bawine bobabili kodwa bazimisele ngokuba sithathwe ngoyedwa wabo.
UDJ Butter ungowaseHammarsdale, entshonalanga yeTheku kanti uNastro yena ungowase-Mnambithi. Njengoba bevela esifundazweni esisodwa bathi bakubeke eceleni ukuthi bayaqhudelana kodwa balwela ukuba isicoco siphelele KwaZulu-Natal.
ODJ asebeke bahlabana ngalesi sicoco kubalwa uMshega waseGoli, uPrince Kaybee waseFree State, kube nguSK wasePort Elizabeth, e-Eastern Cape.
UNastro noButter kabazona izimfunda makhwela endimeni yezomculo, kodwa bebelokhu bengagqami ngoba bebengakalitholi ithuba lokuvela kahle.
UNastro uke wasebenza noMampintsha, uDJ Mbuso, uDJ Mngadi, yiDBNyt nabaningi. UButter yena usebenze noScelo Gowane, uDJ Lesoul nabanye.
I- season yakulo nyaka yohlelo i-One’s and Two’s iqale ukuvela kumabonakude ngesonto eledlule kanti kuyoze kube yinyanga ezayo.
“Yize singavumelekile ukukhuluma ngohlelo ngoba lusadlala kodwa siyazethemba ukuthi sizobuya naso lesi sicoco,” kusho labo DJ.
Yinqwaba yemiklomelo etholwa ngabadle umhlanganiso kulo mncintiswano. Kuyona kubalwa ne- studio sika-R150 000.
UButter noNastro bathi bazosebenzisana uma oyedwa wabo ewina.
“Uma kuhlomula oyedwa wethu siyojabulela lokho ngoba kuyobe kusho ukukhula kwesifundazwe sethu," kusho bona.
Amajaji kulo mncintiswano nguSphectacula noDJ Naves.