KUZOQHAKANJISWA ABAMAFILIMU
UZOQHAKAMBISA abasafufusa emkhakheni wezamafilimu umcimbi wokuklomelisa obizwa ngama-African Emerging Film Awards ozoba seSuncoast Casino, eThekwini ngoMgqibelo.
Lama-award ahlose ukuqhakambisa labo abakulo mkhakha abakhombisa ukuthuthuka ekukhiqizeni amafilimu kusukela kubadidiyeli, ababhali nabalingisi.
Ngokusho kuka-Andile Buwa onguSihlalo weThekwini Filmmakers Association, njengoba lama- award esenzeka okwesihlanu kulo nyaka, sebevule nethuba lokuba abakhiqizi bamafilimu abaqhamuka kwamanye amazwe bakwazi nabo ukuwangenela.
“Nakuba singenawo aqhamuka ngaphandle okwamanje kodwa kusukela ngonyaka ozayo sizobe sesiyivulile iminyango ukuba bangenele nabo ikakhulukazi labo abasafufusa ukuze bezokhuthaze- ka,” kuchaza uBuwa engeza ngokuthi lama- award adlala indima enkulu ekuthuthukiseni umkhakha wamafilimu kuleli nasezwenikazi i-Afrika.
Phakathi kwemikhakha ebhekiwe kula ma- award kubalwa oweBest Actor/Actress, Best Supporting Act/Actress, Best Screen Writer/ Story, Best Director, Best Editor namanye.
Namhlanje ngoLwesine nakusasa ngoLwesihlanu kulindeleke ukuba umphakathi unikwe ithuba lokubuka amanye ala mafilimu aqokiwe eThe Workshop Amphitheatre eThekwini.
Umphakathi ozofika uzozibonela la mafilimu uzothola nethuba lokuxhumana nabadidiyeli bawo.
UBuwa uthi abakhiqizi bala mafilimu bazothola nelinye ithuba lokuqeqeshwa yilabo asebezakhele igama kulo mkhakha.
“Kuhle ukuba sibabonge futhi sibakhuthaze besakhula abenzi bamafilimu ukuze nabo bathuthuke.
"Kuyisifiso sethu esikhulu ukuba sikwazi ukubabona ngelinye ilanga sebephumelele kulo mkhakha,” ephetha.
Kulindeleke ukuba umcimbi wama-award uhanjelwe ngabantu bekhethelo abazobe bemenyiwe.