Lihlehlile elosolwa ngokubulala ongaboni
Ugundwe wagcotshwa itiyela
USAZOQHUBEKA nokubala izinsimbi zesicabha esitokisini usomabhizinisi waseManyiseni, enyakatho-mpumalanga yeKwaZulu-Natal, ongumsolwa ecaleni lokubulawa kowesilisa ongaboni.
NgoMsombuluko iNkantolo yeMantshi yaseNgwavuma ilihlehlisele umhla zingama-29 kwephezulu - ukuyofaka isicelo sebheyili - icala lakhe ngoba ithi kunobufakazi okusamele buqoqwe.
UMnu Vusi Kappa Dlamini - osinde ekubuyeni KaLomahasha, eSwaziland eshaya ngesudi yesele emuva kokuba ekhonjwe emhlahlweni njengomuntu obulele uMnu Mathendele Nsimbi - akayedwa kulolu daba njengoba enukwe noMnu Nhloko Mathenjwa.
Emuva kwalokho bahlanze lonke iqiniso phambi kwamalunga omphakathi abevutha bhe. Ukuveva komphakathi kuholele ekubeni uMnu Dlamini noMnu Mathenjwa bazingenele bona evenini yamaphoyisa mhla zi- ntathu kwephezulu ngoba besaba ukuthi uzobadla luhlaza.
UMnu Mathenjwa ungumfowabo wenyanga edumile kule ndawo, ebe nyamanambana kusolwa ukuthi inesandla kokwehlele uMnu Nsimbi, isidumbu sakhe esitholwe yiphisi siphoswe phakathi kwamawa agudle intaba ewumngcele ohlukanisa iNingizimu Afrika neSwaziland.
Isidumbu sikaMnu Nsimbi sitholwe sicwiyiwe zingama-28 kuNdasa (March) emuva kokuba yena elahleke zingama-28 kuNhlolanja (February). Namanje izinwele kazibonwa ekhanda likaMnu Dlamini emuva kokuba egundwe wagcotshwa itiyela eSwaziland emuva kokukhishwa emhlahlweni - okuwuphawu lokuthi ukhiphe umphefumulo.
UMnu Dlamini noMnu Mathenjwa bavela enkantolo nje, bendulelwe ngamalunga omphakathi aboshelwe ukushisa imizi yabo emuva kokuba behlanze iqiniso ngokufa kukaMnu Nsimbi.
UMnu Cebolenkosi Mathenjwa, uMnu Ndumiso Mathe, uNkk Sbongile Mngomezulu, uNkz Lungile Nsimbi, uNkz Betty Mabaso, uNkz Banelile Mathenjwa, uMnu Samkelo Mathenjwa, uMnu Lucas Masango, uNkz Nozizwe Gumbi, uNkz Angel Gumede, uNkz Thabisile Mngomezulu, uNkz Ntombifuthi Mngomezulu, uNkz Thandisiwe Mngomezulu, uMnu Ntokozo Mathenjwa noNkz Vuyisile Nsimbi babhekene necala lokuthungela ngomlilo imizi emithathu.
Baphume ngebheyili ka-R300 umuntu ngamunye kanti icala labo lihlehlele usuku olungaziwa. Ngosuku anikwe ngalo ibheyili, abeziqhumisela uhleko engazi nokuthi lidumephi. NgoMsombuluko abezithobile phambi kweMantshi uDouglas Ngcobo.
Bonke laba bamelwe ngummeli wamahhala abamthole ngosizo lukahulumeni, uMnu Senzo Zindela.
Enkantolo bebesekwe ngozakwabo abebeshaya ingoma beyisheba ngeziqubulo ezinamandla. Ezinye zalezi zingoma bezigadla kuMnu Dlamini.