ICHIEFS ENCANE IZODLALA NEKWADUKUZA
IKAIZER Chiefs egijima kwiMultiChoice Diski Challenge (MDC) izotheleka KwaDukuza izobhekana nesikwati sakule ndawo ngoMgqibelo eStanger Manor Sports Field.
Isikwati sakwaDukuza sikhandwe ngabadlali abaqhamuka ezindaweni ezahlukene zakule ndawo. Besiqokwa ngaphansi kweso leSouth African Football Association (Safa) iLembe Region eholwa nguHlelizwe Mhlongo neKwaDukuza Local Football Association.
URicardo Mthembu oyiMeya yaKwaDukuza, uthi lo mdlalo bahlose ngawo ukunika abafana bendawo ithuba lokubhekana nekilabhu ehlelekile ukuze bezoqina ukhakhayi.
“Kulo nyaka siyifingqe kakhulu imikhono ekuthuthukisweni kwezemidlalo ikakhulukazi ibhola lezinyawo. Kusikhuthaze kakhulu ukwenza kahle kweKwaDukuza FC kwiNedbank Cup. Isasasa elikhonjiswe wumphakathi uyo- kweseka le kilabhu eThekwini, yilona elisigqugquzele ukuletha iChiefs kule ndawo.
"Sisaxoxisana neChiefs ukuletha isikimu sayo esikhulu kule ndawo. Ngeke sigcine ngeChiefs kuphela kodwa sizimisele ngokumema namanye amakilabhu agijima kwi-Absa Premiership ikakhulukazi awalapha KwaZuluNatal ngoba kasifuni ukuthi abadlali bafudukele eGoli ekubeni nathi sinawo amakilabhu ethu,” kusho uMthembu.
Ngaphambi kwalo mdlalo kuzodudulana izingqwele zikaU/15 kwiNothern Stream nezeSouthern Stream. Amakhansela aKwaDukuza azobhekana noKhozi FM bese kuthi ikilabhu yakwaDukuza yeNetball idlale noKhozi FM.
Lo mqhudelwano uhlelwa ngokubambisana wuMasipala waKwaDukuza, iSafa, uKhozi neChiefs, kanti umphakathi unxuswa ukuphuma ngobuningi uzoyeseka. Kungenwa mahhala kule midlalo, kanti kuqalwa ngo-9 ekuseni.
Sisaxoxisana neChiefs ukuletha isikimu sayo esikhulu kule ndawo.