ABAGIJIMI BAZOLULA IMISIPHA EMJAHWENI WASE-KLAARWATER
IZINDLELA zabagijimi bamabanga amafushane baKwaZulu-Natal kulindeleke ukuba zibheke eKlaarwater ukuyolula imisipha kwiFun Run yebanga lika-5km ezoqala iphinde iphelele emgwaqeni uNsizwakazi kule ndawo.
Lo mjaho uqale ngowezi-2009 kanti ubonakala ukhula ngesikhulu isivinini. Ngokusho komdidiyeli wale Fun Run, uNicholas Mchunu, nakuba lo mjaho bewuhlelele umphakathi owakhele le ndawo namaphethelo kubalwa owakwaSanti, KwaNdengezi, eMpola, eNteke kodwa bamukelekile nabaphuma ngaphandle kwalezi zindawo.
Uthi bazoqala ukwamukela imingenelo kusuka ngo-6 ekuseni kuze kube ngu-08h30. Uthi abenze kahle bazohlomula ngemiklomelo eyahlukene okuhlanganisa imali, izindondo nama- lucky draw. Inhloso yawo wukugqugquzela umphakathi ukuzivoca ukuhlala uyimiqemane.
Ngosuku lomjaho kuzonandisa abaculi bendawo. Abanesifiso sokuba yingxenye yawo bangaxhumana noMchunu kwethi: 083 570 0554.
Kusenjalo, isifudukela eFree State imidlalo yeBrutal Fruit Netball Premier League eqale ngenyanga edlule eThekwini yaqhubekela eCape Town njengoba isiseBloemfontein.
Nonyaka iqembu laKwaZuluNatal, iKingdom Stars, izinto ziyaliphika njengoba lilele endaweni yesi-9 emuva kwemidlalo eyisi-7. Linephuzu elilodwa nje vo ngokudlala ngokulingana kowodwa lehlulwa kweyisi-6.
Uhlu lwemidlalo yeBrutal Fruit engempelasonto lumi kanje: KUSASA NGOLWESIHLANU EMangaung Indoor Centre: Crinums vs Diamonds 18h00, Kingdom Stars vs Sunbirds 20h00. NGOMGQIBELO EMangaung Indoor Centre: Stings vs Sunbirds 14h00, Diamonds vs Kingdom Stars 16h00, Jaguars vs Fireballs 18h00. NGESONTO EMangaung Indoor Centre: Aloes vs Baobabs 10h30, Flames vs Stings 12h30.