UKUTHULA KUVOTWA ENQUTHU
Basola umasipala ngokwehluleka
BEKUVUNGUZA umoya wokuthula phakathi kwabalandeli bamaqembu ezepolitiki ngesikhathi kuvotwa kuMasipala waseNquthu izolo ngoLwesithathu. Lapha kubonakala insizwa eyilunga le-African National Congress (ANC) idansa nentokazi yeNkatha Freedom Party (IFP) kumnandi.
UDUBE ukuvota umndeni wezingane ezintathu ezishayiswe yimoto ziyokha amanzi eNquthu, enyakatho neKwaZulu-Natal zashonela khona lapho ngoMsombuluko.
Lo mndeni uthi izingane zawo ngabe kazishonanga kabuhlungu kanjena ukuba umasipala wale ndawo obuwuvotele ubahlinzekile ngezidingongqangi, okubalwa kuzona amanzi.
Kule ngozi kushone uZama Ngcobo (17), u-Andiswa Buthelezi (11) no-Ayanda Mazibuko (9). Ngokusho komunye wonina balezi zingane ezishonile, uNkk MaSibiya Ngcobo, sekuphele iminyaka emine amanzi bengenawo.
“Laba bantu kade kwasa sibavotela kodwa intuthuko sigcine ngokungayiboni, kuthuthuke bona kuphela. Bagijima ngezimoto ezisho ngamasondo emhlane bangabe besayingena indaba yokuthuthukisa abantu ababavotele.
“Ukuvota nokungavoti kwethu kuyafana nje,” kusho yena. Echaza ngokwenzikile ngosuku lwesigameko, izingane zibuye esikoleni zawasha umfaniswano wazo wesikole. Zibizene zahamba zayokha amanzi. Uthi zithe zisamile emgwaqweni zilinde ukuba kudlule izimoto bese ziwela, kwaqhamuka le moto ebishayelwa ngowesifazane yaphuma emgwaqweni yazishaya zonke zalala uyaca.
“Thina sibizwe ngabantu bethi masiyobona nazi izingane sezishayiswe yimoto. Siyafika kazisekho,” kusho yena echiphiza. Izingane zizofihlwa ngoMgqibelo khona eNquthu.
Ezikhungweni eziningi zokuvota kugqame kakhulu ukubekezelelana emaqenjini ezepolitiki njengoba bekunokhetho lokuchi- biyela kuMasipala waseNquthu izolo ngoLwesithathu. Amaqembu ezepolitiki okubalwa kuwona i-African National Congress (ANC), iNkatha Freedom Party (IFP), iDemocratic Alliance (DA), i-Economic Freedom Fighters (EFF) neNational Freedom Party (NFP), abebonakala ecula ngaphandle kuzona zonke izikhungo zokuvota, enxenxa abantu ukuba bangene ngaphakathi bavote.
Izimoto zamaqembu bezehla zenyuka edolobheni lakule ndawo zishaya amahuthi, umculo nomkikizo kuqhuma phezulu. Umholi weDA KwaZulu-Natal, uMnu Zwakele Mncwango naye obephansi phezulu evakashela izikhungo zokuvota uthe bakujabulele ukuthi kuzona zonke izindawo abazivakashele basabone kunokuthula njengoba bekunovalo lokuthi kuzoba nezinxushunxushu.
“Nakuba abantu bebengebaningi ezikhungweni zokuvota ekuseni, kodwa manje njengoba seliyoshona ilanga sibabona bethuthelana bezovota. Lokhu kukodwa kuyasikhombisa ukuthi abantu sebekhathele ukubona isimo sentuthuko kule ndawo simi ndawonye, sebefuna ngempela ukubona ushintsho.
USihlalo we-IFP, uMnu Blessed Gwala, uthe bakujabulele ukuthi umphakathi uphume ngobuningi bawo ukuyovota. Uthe banethemba lokuthi iNkatha izodla umhlanganiso yize i-ANC ibisizama ukukhohlakala iqasha amabhasi asuka koMlazi ethutha abantu ukuba bayovota eNquthu.
“Sinele sabona lesi senzo sabo bawahoxisa amabhasi ali-10 abebewaqashile,” kusho uMnu Gwala. thandeka.ngobese@ilanganews.co.za
Laba bantu kade kwasa sibavotela kodwa intuthuko sigcina ngokungayiboni, kuthuthuke bona kuphela. Bagijima...