Ngikhanyiseleni bo ngamabandla osindiso
MHLELI: Emasontweni adlule, ngigcine ngibuzile kwelakho ngamabandla osindiso. Umbuzo wami ubusekutheni avelaphi amabandla osindiso njengoba egcwele umhlaba wonke.
Lokho ngikubuziswa wukuthi ngesikhathi abahlwanyeli bokuqala bevangeli, amamishinari, befika kobaba mkhulu babafica benenkolo yabo yomdabu. Inkolo yomdabu incike emadlozini noma kobabamkhulu.
Sihlabela abangasekho, sikhulume nabo ngempepho futhi sigaya utshwala besintu senze nemikhuba yethu. Kuhambe kwahamba kwafika amamishinari, asifica sikhonza uNkulunkulu ngendlela yethu yomdabu, simbiza ngoMvelinqangi, ngokuthi nguyena owavela kuqala.
Bekuthi uma kubhilite isomiso sinyukele entabeni siyokhuleka, emuva kwalokho imvula kuyoba yisiwoklo. Laba bahlwanyeli njalo engikhuluma ngabo: AmaRoma aKhatholika, amaLuthela, amaSheshi, amaDashi namaWeseli. Bona basilethela ivangeli nemfundo yasentshonalanga.
Yize thina bantu base-Afrika sivele sinayo imfundo yethu yomdabu, okuphawuleka ngabahlwanyeli wukuthi kabazange bacwase inkolo yethu, amasiko ethu ngokunjalo nemikhuba yethu.
Inkinga yami iqale emabandleni osi- ndiso enginemibuzo ngawo, avelaphi wona ngoba kawafikanga ngesikhathi sabahlwanyeli? Yini eholele ekubeni kuthi kunevangeli alifice likhona wona alethe elinye? Ngabe leli vangeli labahlwanyeli bokuqala belishoda ngokuthile?
Uma belishoda ngokuthile, kanjani? Abosindiso bona bakuthathaphi ukuthi okuficiwe bakuguqule?
Buka ngoba isikhathi esiningi abosindiso bagxile esivumelweni [Testament] esisha kunesidala. Wona la mabandla osindiso ngabe abikwa endlunkulu?
Lokho ngikusho ngoba abahlwanyeli bahamba bayozethula esilweni esasibusa ngaleyo minyaka. Ngisho noMqaliwendlela (uMprofethi Isaiah Shembe) ibandla lamaNazaretha walethula eNdlunkulu kaZulu.
Ngicela ozongikhanyisela ngamabandla osondiso. Buka amabandla osindiso imikhuba ayigilayo kamuva, aphuzisa abantu ophethiloli, kudliwa utshani, kudliwa izinyoka, kufuthwana ngeDoom njalo njalo.
Zonke lezi zimanga zenziwa egameni losindiso. Ephephandabeni lomhla zingama-22 kuLwezi (November), kunomfundi ozibize ngoMinenhle Hlongwane, obhale isihloko esithi, “Insindiso kaNkulunkulu ngeyawo wonke umu- ntu”.
Kangiqondi noma uNgwane wayephendula mina yini noma wayephendula omunye owabhalayo. Mangiqagele ukuthi mhlawumbe wayephendula mina. Uma-ke uNgwane ethi insindiso kaNkulunkulu ngeyabo bonke abantu, uthi masingazihlukanisi noNkulunkulu ngokubalekela insindiso.
Uyaqhubeka weluleka ngokushumayeza ngokuthi makuvulwe kuyiphi incwadi. Okufike kungixake wukuthi uyayiphika indaba yosindiso yamabandla. Uthi yinto engekho leyo ngakho masiyeke ukukhuluma izinto esingazazi. Ingani sizwa ngabo abasindisiwe uma sikhuluma nabo, bavele bathi bona basindisiwe, into ethile akayenzi yena. Ngwane!
Uma kuwukuthi uphendula mina, kangibuzanga ukuthi insindiso itholakala kubani, nanokuthi iqondene nobani njengoba uchaza. Uma kuwukuthi uNgwane ubephendula mina, cha ubengaphenduli mina, ubegqwegqwa phezulu futhi ephendula noma ekhuluma ngokunye, okungaqondene nalokhu mina ebengikubuza futhi namanje ngisakubuza, avelaphi amabandla osindiso na? Xola Matiwane uma kuwukuthi ubungaphenduli mina.