I- MEDIA INGAKWAKHA FUTHI INGAQEDA NGAWE
ISOUTH Africa ingelinye lamazwe azokumangaza ngenxa yezinto ezenzekayo. Ikakhulukazi umabonakude, uzokushiya ukhathele ngezinto ozenzayo empilweni yabantu. Uyazi ukuba abantu bayakuqonda okwenziwa ngumabonakude ezimpilweni zabo ngabe bayazama ukuba baziqhelelanise nezinto eziningi ezikhonjiswa kumabonakude.
Lapha ngikhuluma ngohlelo olungundaba mlonyeni cishe kubona bonke abesifazane kuleli. Haibo, phela ngoLwesine olwedlule kukhonjiswe isiqephu sokuqala sohlelo olubizwa Uthando neS’thembu kuMzansi Magic (161), ngehora lesi-8 ebusuku.
Lolu hlelo impela ludlisele ogageni cishe izinhlelo eziningi kwamanye ama-channel njengoba amehlo abantu abaningi avele athi njo kulo, befuna ukuzibonela le mpunyela enguMnu Musa Mseleku enamakhosikazi amane futhi ephilwa impilo ephezulu.
Isiqephu sokuqala salolu hlelo sikuveze obala ukuthi kulo muzi kaludliwa olubabayo kodwa kudliwa izambane likapondo.
Impilo ebuthebelele ebonakala iphila emizini kaMnu Mseleku yiyona eyenze abesifazane bahlanya, kwasala khona nje ukuba bacoshe amaphepha. Ngemuva kokukhonjiswa kwalolu hlelo uMnu Mseleku nomndeni wakhe baphenduke osaziwayo nezilomo ngamaminithi nje ambalwa. Kuthe uma si- ngena ezinkundleni zokuxhumana kwacaca ukuthi hhayi cha liyabhubha. Lolu hlelo lujike umqondo yabesifazane abaningi ngemizuzu engamashumi amabili nesihlanu nje kuphela ( 25 minutes), kakhulu labo abebengahambisani nesithembu. Kuyamangaza ukuthi kukhona abantu besifazane abaze bazibika kuMnu Mseleku ngoba nje bebone impilo ebuthebelele. Ngiyazibuza nje ukuthi kodwa kungani kungenziwa izinhlelo ezibhekiswe ngqo kubantu besilisa ezikhuluma ngalesi sihlava sokubulawa kwabantu besifazane i-South Africa ebhekene naso kulezi zinsuku ngoba kuyacaca ukuthi mkhulu umthelela ezinye izinhlelo zikamabonakude eziba nawo kubantu. Angisho ukuthi lolu hlelo alunasifundo futhi lona alubalulekile. Yebo sikhona isifundo esitholakalayo kulo. Kulokhu ngingathanda ukuphonsa inselelo kubabhali nabahleli bomdlalo Isikizi ukuba bathi ukunciphisa izithombe zodlame ezinyantisayo abaziveza kulo mdlalo.