ISIDALE INKIYANKIYA INDABA YE-VIRUS EQOLA IZINKAMPANI
SEKUSEKE enkulu inkinga emhlabeni wonke ngenxa yenkunzimalanga ye-ransomeware ebizwa ngokuthi yi-wannacry okuyi- virus yamakhompyutha etsha futhi exakile emhlabeni wonke.
Kusukela ekuqaleni kwale nyanga iziphethe kabi izinkampani ezinkulu njengoba lezi zigilamkhuba zibavalela amakhompyutha bengakwazi ukusebenza.
Phela uma usubanjwe yile- virus izigilamkhuba zifuna ukhokhe imali elinganiselwa ku-$300 ngohlelo lwamaBitcoins okwenza ukuba kungabonakali imininingwane yomuntu omkhokhelile. Isilinganiselwa ku $24 000 imali esakhokhiwe ngabanikazi bezinkampani ebezivelelwe yile nkinga.
Lokhu kukhombisa ngokusobala ukuthi izelelesi ziyangenisa kakhulu nge-cyber attack. Kuyethusa-ke lokhu ngoba imininingwane yethu eminingi isihlala kumakhompyutha. Le- virus ebizwa ngokuthi yi- wannacry uyibona uma uvula ikhompyutha yakho, ayisuki futhi awukwazikwenza lutho ngaphandle kokuba ukhokhe lemali bese iyavuleka.
Kodwa ikhona i-antivirus enamandla ekwaziyo ukuyisusa yize abanye abantu emazweni aphesheya sebezikhokhele izigebengu zobuchwepheshe. Yingakho kubalulekile ukuba ne- internet security emshinini wakho.
Abantu abangabhekani nale nkinga yithina esiphatha imishini ebizayo yakwa- Apple, sengisho amaMacbook phela ngoba wona awangenwa ngamavirus futhi asikho nesidingo se- antivirus noma i- internet security.
Kubukeka zizokwanda izigigaba zokuqola ngokusebenzisa ubuchwepheshe njengoba sekuqalile nje kuphazamiseka nokusebenza ezinkampanini ezinkulu emazweni aphesheya kanti nakuleli wenzekile umonakalo kwezinye izinkampani ezinkulu.
Kubalulekile ukuvikela imininingwane yakho ehlala kwi-internet ngasosonke isikhathi.