Izimfene zihlekana iziphongo kwiPSL
IBHOLA: Bonke abasemsileni bazibona bezosinda ezembeni
USIFUMBU ubona uqhaqhazela emakilabhini abhekene nengozi yokugencwa yizembe njengoba wonke ekholwa wukuthi ngeke liwagence.
Usuku lwangoMgqibelo luzophela kukhona ukukhala nokugedla kwamazinyo, kwabanye kuyinjabulo njengoba isizini yezi-2016/17 igoqwa ngokusemthethweni. IBidvest Wits kudala iyiqalile injabulo njengoba imenyezelwe ngeledlule ukuthi iyizingqwele ezintsha zeligi ihlula iPolokwane City ngo-2-0 eBidvest Stadium, eGoli.
Amehlo asethe njo ekutheni ngubani ozokuya ehlathini, ozodlala eyokuhlunga nozosinda njengoba eyisihlanu amakilabhu abhekene nezembe.
La makilabhu yi-Baroka FC, Highlands Park, Free State Stars, Chippa United neBloemfontein Celtic. Izibalo zikhomba ukuthi eyodwa kula makilabhu izogencwa yizembe.
Nokho izimfivilithi ukuhamba yiBaroka ezobhekana ne-Ajax Cape Town ngoMgqibelo ngo-15h00 eCape Town Stadium.
Umthwalo ubukeka unzima kwiBaroka njengoba i-Ajax ifuna ukungena kwi-top 8 kanti iyasidedela isibhaxu ekhaya.
Kuma-play-off kuthishwa iHighlands Park ezobhekana neMamelodi Sundowns ngoMgqibelo ngo15h00 eMakhulong Stadium, eTembisa.
ISundowns ifuna ukuwunqoba kumnyama kubomvu lo mdlalo ngoba uma ingahlulwa, iCape Town City iguqise iPolokwane City ngoMgqibelo ngo-15h00 ePeter Mokaba Stadium, ePolokwane, izolahlakelwa yindawo yeCaf Champions League njengoba sekusele eyodwa. NeCeltic izalelwe yinja endlini njengoba izoshukana neMaritzburg United efuna i-top 8 ngoMgqibelo ngo-15h00 eHarry Gwala Stadium, eMgungundlovu.
Umdlalo ozoshuba ngophakathi kweFree State Stars neChippa United ngoMgqibelo ngo-15h00 eGoble Park, eBethlehem. La makilabhu kufanele azenzele wona umsebenzi ngoba ozohlulwa bese zinqoba izimbangi uzokuba senkingeni. Nokho kubona bonke ababhekene nezembe akekho othi uya ehlathini, kunalokho omunye ukhomba omunye.
UKgoloko Thobejane ocija iBaroka FC okuthe uma kuqala isizini wathi uzonqoba iligi, uthi ezakhe kaziyi ndawo.
“Izembe yinto esingayiphuphi ngisho silele abantu abaya lapho akithina bayazani bona. Noma ngabe sidlalela kuphi i-Ajax ngeke isehlule,” kusho uThobejane.
USinki Mnisi oyisikhulu esiphezulu kwiHighlands, uthi yize bebhekene nomdlalo onzima kodwa kabayi ehlathini.
“Kasinandaba nokuthi abanye bazokwenzenjani, esizokwenza wukunqoba lo mdlalo nje bese beya-ke labo abaya ehlathini ngoba akithina,” kusho uMnisi.
UDan “Dance” Malesela osanda kushaya ibuya kwiChippa, uthi ezakhe ziwuhlomele nxa zonke lo mdlalo.
“Ukuhlulwa kwethu kungasibeka engcupheni ngakho-ke kubal- ulekile ukuthi siwunqobe lo mdlalo. Kodwa ehlathini yilapho esingayi khona,” kusho uMalesela.
USerame Letsoaka ocija iFree State, uthi kabayi ndawo.
“Kube yisibusiso ukuthi sibhekane nekilabhu esesimweni esifana nesethu ngoba bayazi abadlali bethu ukuthi ukuze bagcine imisebenzi yabo kufanele bazishayele iChippa.
"Nginethemba lokuthi ngeke siye ehlathini, ekhaya akuphumi lutho,” kusho uLetsoaka.
UKhumbulani Konco oyisikhulu esiphezulu kwiCeltic, uthi akakholwa ukuthi ezakhe zisembangweni wokusinda ezembeni.
“Thina kasikho lapho, kunalokho sesiqale izinhlelo zokulungiselela isizini entsha.
Nakuba izibalo zikhomba ukuthi sisangagencwa yizembe kodwa angikuboni kwenzeka sidinga iphuzu, isimo sethu nalawa amanye amakilabhu sihluke kakhulu.
"Ozokuya ehlathini uphakathi kwala makilabhu amane hhayi thina,” kusho uKonco.