BASHIYE ABANGALAZI NGAMA-SAMA
SIPHUME siqhulula inhlamba isilomo se-kwaito emcimbini wokuklomelisa abaculi ngezindondo, amaSouth African Music Awards, obuseSun City Superbowl eNorth West ngoMgqibelo ebusuku.
UMandla Maphumulo odume ngelikaMampintsha kulo mkhakha, uzwakale eqhulula inhlamba egxeka ama-awadi ewasola ngokwenzelela ngesikhathi esephuma kulo mcimbi. Lo mculi obuye abe ngumphathi wenkampani iWest Ink ephethe uBabes Wodumo, ushiye angalazi ngemicimbi yamaaward eNingizimu Afrika.
“F@#k the awards, f@#k the samas. Ngeke basiqede sizoqhubeka nokwenza umculo ngoba abantu bayakhombisa ukuthi bayasithanda. UBabes uzoqhubeka nokwenza umculo ngaphandle kwamaawadi,” kusho uMampintsha ezwakalisa ukunengeka kwakhe ngemuva kokuba uBabes ekhale ngaphansi kuyona yonke imikhakha abeqokwe kuyona kula ma-awadi.
Lokhu uMampintsha ubekusholo phezulu aze alinganise nangezandla. UBabes ubabele enkundleni yokuxhumana i-Instagram ezwakalisa ukudumala kwakhe. Ukusho ngaphandle kokunanaza ukuthi kuleli ama-awadi ayathengwa.
“Ngeke ukuthi ingoma yakho ibe sematheni unyaka wonke kodwa ungatholi lutho. Ngize ngaqokwa nakuma-awadiaphesheya kodwa lapha eNingi-zimu Afrika angitholi lutho.
"Qhubekani nokuthenga amaawadi ngeke silambe sisazoqhubeka nokuqashwa emicimbini futhi ngisazoqhubeka nokuba nguBabes lo engiwuyena noMampintsha usazoqhubeka neWest Ink isazoqhubeka," kusho uBabes.
Ukungaklonyeliswa kukaBabes kuphinde kwadumaza noDJ Sox oyilungu leDurban's Finest. Lo DJ ukubeke kwacaca ukuthi udumele ngokungaklonyeliswa kwalo mculi.
“Yinto esingeke siyifihle ukuthi uBabes ufikile futhi unethalente kuyadumaza ukuba angakutholi ukuhlonishwa ngekhono lakhe,” kusho uSox naye okhale ngaphansi njengoba iDurban's Finest ingayitholanga indondo.
IDurban's Finest ibiqokwe emkhakheni weBest Dance. Kula ma-awadi kukhonye uKwesta noAmanda Black. UKwesta uwole izindondo eziyisithupha kwathi u-Amanda wahlomula ngezine.