UCHAZEKILE OWE-CHIEFS

UNEPHUPHO lokubona amakilabhu aKwaZulu-Natal ehamba ibanga elide kwiMTN8 uFarook “Ntshebe” Kadodia ongumnikazi weMaritzburg United eqede ihlezi endaweni yesi-7 kwi- log.

Lesi sifundazwe sibe nenhlanhla kule sizini kungena womabili amakilabhu aso kwi- top 8 njengoba neLamontville Golden Arrows isonge iyibambe endaweni yesi-8. I-Arrows ingene seliyoshona iguqi- sa i-Orlando Pirates ngo-2-1 ngoMgqibelo eMoses Mabhida Stadium, eThekwini.

UKadodia uthi kube yizindaba ezimnandi kakhulu ukuqeda kwitop 8, uthi inhliziyo yakhe igezekile.

“Esikhathini esiningi amakilabhu aphuma kulesi sifundazwe ahlale ebalwa nalwela ukubalekela izembe.

"Nginethemba lokuthi kulo mqhudelwano azohanga ibanga elide ukukhombisa ukuthi ibhola lakulesi sifundazwe likhuphukile,” kusho lesi sikhulu ezaso ezisonge isizini ngokubambana neBloemfontein Celtic kuba ngu-11 eHarry Gwala Stadium, eMgungundlovu.

UGordon Masondo oyisikhulu esiphezulu se-Arrows uzwakalise injabulo ngokubuyisa izinduku kwiBucs ebakhiphe kwiNedbank Cup ngeledlule. Ubonge abadlali nabaqeqeshi ngokusebenza kanzima.

UClinton Larsen ocija i-Arrows uthi kuningi okuhle okusazokwenzeka uma abadlali bakhe beqhubeka nokudlala ngokuzikhandla. Uncome kakhulu uKnox Mutizwa abamboleke kwiBidvest Wits oshayele Abafana Bes’thende igoli lokunqoba njengoba elokuqala lishaywe nguLerato Lamola.

Inkundla ibivulwe nguThamsanqa Gabuza.

Uzwakalise enkulu injabulo ngokungena kwiMTN8 anethemba lokuthi izoqinisa ukhakhayi abadlali bakhe kwazise iningi labo lisathuka isisinga.

I-Arrows seyake yayinqoba iMTN8 ngesikhathi isacijwa nguManqoba “TV” Mngqithi ngowezi-2009 ilobola kowamanqamu i-Ajax Cape Town ngo-6-0.

Isiyonke imiphumela yayizolo imi kanje: Chiefs 1, Wits 0; Ajax 0, Baroka 1; SuperSport 0, Platinum 1; Arrows 2, Pirates 1; Free State Stars 0, Chippa 0; Maritzburg Utd 1, Celtic 1; Polokwane 4, Cape Town City 2; Highlands 2, Sundowns 2.