Ikhale ngamacebo angcolile i-IFP eNquthu
EZEPOLITIKI: Ithi bekusetshenziswa izinsiza zikahulumeni
UMENGAMELI weNkatha Freedom Party (IFP), iNkosi Mangosuthu Buthelezi, uveze ikhadi le-African National Congress (ANC) athi ulithathe esalukazini saseNquthu, enyakatho yeKwaZulu-Natal, sithi bebenikwa wona njengoba bekuzovotwa, betshelwa ukuba bavotele liphi iqembu. Utshele ILANGA ukuthi lokhu kukhomba ukuthi i-ANC ihlale ibahlula ngobugebengu ezinkethweni.
Lokhu ikusho ngoLwesihlanu emahhovisini e-IFP eThekwini ngesikhathi leli qembu lijabulela ukunqoba kwalo ukhetho lokuchibiyela eNquthu njengoba likhale lemuka namawadi ali-14 kwali-17, lathola izihlalo ezili-19 kwezingama-33 kumasipala.
INkosi Buthelezi ithi kakwethusanga nokuba i-ANC isebenzise izinsiza zikahulumeni ukuheha abantu ukuba bayivotele. “Abantu ngibatshelile ukuthi uma benikwa ukudla bangakunqabi, bakuthathe badle basuke kodwa bese bevota ngonembeza babo,” kusho iNkosi Buthelezi.
Ithi njengoba bethathe iNquthu, kuyabathokozisa ukuthi iyithikithi lokuthatha noMasipala wesiFunda uMzinyathi.
“Inkohlakalo eyenzeke KwaNongoma, kasikhulumi ngenzwabethi ngoba abacwaningi-mabhuku bashilo, ikho-mbisa ukuthi umshado we-ANC neNFP (National Freedom Party) ubunekohlakalo.
"NaseMzinyathi kunuka santungwana, kuzocaca ukuthi kungani imeya yabo (uMfu James Mthethwa) beyisusile bayisa phezulu (ephalamende).
"Kuyacaca ukuthi bebesebenza kangaka ukuze singayitholi iNquthu nje ngoba bebebona ukuthi sizofica amanyala wodwa,” kusho iNkosi Buthelezi.
Ibonge abantu baseNquthu, yiDemocratic Alliance (DA), yiEconomic Freedom Fighters (EFF) , abanye abaholi be-IFP “nabo bonke abantu abenze ukuba sinqobe ngamalengiso noNku- lunkulu ngoba nguyena ogcine enze ukuba izinto zenzeke ngale ndlela”. Mayelana nokuthi njengoba i-IFP isinqobile, izobenzelani abantu baseNquthu, uShenge uthe njengoba ehlala esho ukuthi yena akafuni ukubala amatshwele inkukhu isawafukamele, ngeke asho okuzokwenzeka kodwa umphumela wokhetho ukhomba ukuthi likhona ithemba lezinto ezinhle. Utuse kakhulu abantu baseNquthu ngoba ethi bakhombise ukubethemba ubuqotho beIFP. USihlalo we-IFP, uMnu Blessed Gwala, uthe bazoba sezithendeni zamalunga abo azongena ezikhundleni eNquthu bawabheke ukuthi awuphethe ngendlela yini.
Uthi lo masipala uke waba nenhlese yokuxhashazwa kwezimali zabakhokhi bentela, bafuna ukuwuthatha bawubeke kwelinye izinga ngoba abantu baseNquthu bavotele iNkatha ngoba beyethemba futhi bazi ukuthi kayizihlanganisi nenkohlakalo.
“Sizongena sishayele, siphenye nangaphansi kwemibhede sibheke ukuthi laba abebekhona kabashiyanga lutho yini olubolile okuzothi uma sekungena iNkatha iphunga libe selivimbanisile, kugcine sekuthiwa yiyona egcolisile.
"Sizokwenza isiqiniseko sokuthi uma kukhona ukungcola sikubeka obala, abantu baseNquthu bakubone ukuze bangasho ukuthi kubolise thina.
"Ngemuva kokumisa lo masipala sizoyolungisa naseMzinyathi ngoba uma kuzobe kungashayeliwe khona, kuzoba nzima ukuyisa intuthuko eNquthu njengoba isifunda kuyisona esiphakela lo masipala,” kusho uMnu Gwala.
Uthi sebefisa sengathi ngabe seziphelile lezi zinsuku ezili-14 ezimiswe yi-Independent Electoral Commission (IEC) okumele bazilinde ngaphambi kokuba abaholi bakamasipala baqale ukusebenza.
INquthu inqotshwa yi-IFP nje, okhethweni obelumhla zintathu kuNcwaba (October), bekufanele kuhole yona kodwa kwaba nezixakaxaka kulokhu kuphazamiseka imihlangano yokukhetha ubuholi kwaze kwaphela izinsuku ezingama-90.
Lokhu kunike amandla uNgqongqoshe wezokuBusa ngokuBambisana nezoMdabu KwaZuluNatal, uNkk Nomusa Dube-Ncube ukuba athi makuvotwe kabusha.