Inkosi nenduna kolombango wesidumbu
Ingoduso ifike isiphethe incwadi yesabelo samafa
LUYASHUBA udaba lombango wesidumbu sowesilisa wakwaDuma eSahlumbe, eWeenen, maphakathi neKwaZulu-Natal, osekuphele inyanga nesonto singathuniwe ngenxa yokushayisana komndeni nenguduso yakhe abehlala nayo.
Kubikwa ukuthi lolu daba seluxove umndeni lwahlanganisa inkosi yendawo nenduna yayo, okubikwa ukuthi sekufakaziswa ngabo kwelokuthi banolwazi ngomshado kamufi uMnu Jabulani Duma (45), odutshulwe ngezinhlamvu ezingaphezulu kwezili-10 ebuya emsebenzini.
Kuthiwa uNkz Nokuthula Madonsela, oyingoduso kaMnu Duma, ushaya phansi ngonyawo uthi isidumbu sizongcwatshwa nguyena ngoba ubeshadile nomufi kodwa incwadi yomshado akayivezi, okuyikhona osekubambezela umngcwabo.
Ngokuthola kweLANGA, ngesonto eledlule umndeni ubusenka- ntolo lapho uNkz Madonsela eveze khona incwadi efungelwe emaphoyiseni, ebhalwe nguNkz Jabulile Duma oyilunga lomndeni kamufi efakazela umshado wesintu (phakathi kukamufi noNkz Madonsela) okubikwa ukuthi wenzeke kuMandulo (September) ngowezi-2011.
Kuthiwa kule ncwadi kuthinteka negama lenkosi yendawo, uSphambandla Mthembu nenduna uMnu Bongani Mhlongo, kuthiwa umshado wenziwe endaweni yabo futhi nabo bekhona.
Umthombo uthi inkantolo iyiphikisile le ncwadi yathi kayisho lutho. Kuthe uma kubizwa uNkz Duma wafika waziqhathulula wathi yena ubizwe nguNkz Madonsela wathi ucela ayosayina incwadi ebhalwe ukuthi isoka lakhe (uNkz Duma) belingumkhongi. Uthe uyakuqabuka okomshado.
“Kwenzeke insambatheka laphaya, konke obekukhulunywa bekungahlangani. Sekucacile ukuthi isidumbu sibangwa ngenxa yezimali kwazise uMnu Duma ubesanda kwesula emsebenzini wakhe wobusosha wathola izimali,” kusho umthombo.
UNkz Zanele Duma oyilunga lomndeni kamufi, uthi osekuqhathe kakhulu umndeni wukuthi ingoduso yomfowabo ifike isiphethe nencwadi yesabelo samafa, okuvela ukuthi ibhalwe mhla zingama-20 kuZibandlela (December) nyakenye, umfowabo wadutshulwa ngoMbasa (April) nonyaka.
“Kuthe uma kuqhathaniswa ukusayina kukamfowethu nobekusencwadini yefa kwatholakala ukuthi kakufani nhlobo. Sesivule icala lobugebengu ngalokhu okwenzekile. Kwakhona ukubizwa kwelinye ilunga lomndeni wethu, okungelona elasekhaya egcekeni, kukhomba khona ukuthi kukhona okushaya amanzi,” kusho uNkz Duma.
UMnu Mhlongo uziqhelelanisile nomshado kaNkz Madonsela nomufi wathi kawukaze wenziwe njengoba (uNkz Madonsela) ethi bashade ngokwesintu.
"Ngithole ucingo lwakhe emasontweni edlule ecela ngimsayinele incwadi yesivumelwano selobolo wathi akanayo eyomshado. Kangivumanga, ngithe kumele kube khona nomndeni wakwaDuma.
"Lo mama obhaliswe incwadi efungelwe, sesimyalele ukuba abuyele emaphoyiseni eyochaza ukuthi ubengazi ngobekubhalwe phansi,” kusho uMnu Mhlongo.
INkosi Mthembu ithi ithuke kabi uma izwa lezi zindaba. Itshele ILANGA ukuthi le mindeni usazohlangana nayo.
“Ngiyabona lo muntu ufuna ukungenza isigwili ngoba ngizomhlawulisa ngale nto yakhe,” kusho iNkosi. Ethintwa uNkz Duma (uJabulile) akathandanga ukuphawula, ubuze ukuthi ILANGA liyithathephi inombolo yakhe.
UMnu Duma kuthiwa udutshulelwe emnyango emqashweni wakhe noNkz Madonsela ebuya emsebenzini.
Okhulumela amaphoyisa KwaZulu-Natal, uColonel Thembeka Mbhele, uthi likhona icala elivuliwe lokudutshulwa kukaMnu Duma nakuba kungakaboshwa muntu.
Odabeni lokuvulwa kwecala lenkohlakalo, ukhale ngokuthi kumele kutholakale abaseshi wathi izimpendulo zizotholakala namhlanje ngoMsombuluko.