Babanjiswe wumakhalekhukhwini
EZEZINKANTOLO: Belethula ubufakazi
LIHLUBE udlubu ekhasini iphoyisa ebelethula ubufakazi eNkantolo eNkulu yaseThekwini ngoLwesihlanu emacaleni amane abhekene noMnu Sfiso Mthembu (39), waseVerulam, enyakatho yeTheku okungelokweba, elokubulala uMnu Sandile Khathi, elokubulala uMnu Mthokozisi Ndlovu nelokubamba inkunzi kuhlonyiwe mhla zili-14 kuNhlolanja (February) wezi-2015.
UW/O Jabulani Yaka, ongumphenyi wecala, utshele inkantolo ukuthi ngesikhathi efika endaweni yesigameko, ufice inqwaba yabantu. Uvezele inkantolo ukuthi uMnu Mthembu uqale ukuba ngumsolwa emuva kokuthatha isitatimende kuNkz Nombulelo Mbokazi, ongunina wengane yakhe (uMnu Mthembu) emuva kosuku. “Ngifonele ummangalelwa emuva kokuthatha inombolo yakhe kamakhalekhukhwini kuNkz Mbokazi. Ngimcele ukuba sihlangane kodwa wangafika. Njengoba engazange afike kimina, ngiye kubo ngayombheka kodwa ngangamthola ngoba ubebalekile.
"UNkz Mbokazi ubikile ukuthi uMnu Mthembu ushaye wachitha nemoto yakhe ebinesikhwama, imali nomakhalekhukhwini. Ngithole umakhalekhukhwini kaNkz Mbokazi kuMsizi Mchunu obesefake ikhadi lakhe kuwona. Ngithathe uMnu Mchunu ngayomhloma imibuzo mayelana nomakhalekhukhwini kaNkz Mbokazi.
"Ungitshele ukuthi uwuthathe kuSphamandla Ngidi. Emuva kwesikhathi, ngithathe uMnu Ngidi ngayomphonsa imibuzo ngalo makhalekhukhwini. Ungitshele ukuthi umakhalekhukhwini kaNkz Mbokazi uwudayiselwe nguMnu Mthembu. Ngiphinde ngathola ukuthi uMnu Mthembu udayise omunye umakhalekhukhwini wabafi kowesilisa obizwa ngoPhakamani.
Emuva kokuba sengiqede ukuhlanganisa ubufakazi, ngitshele ozakwethu ukuthi ngithungatha uMnu Mthembu futhi uma bembona kumele zimkhalele,” kusho uW/O Yaka. Utshele inkantolo ukuthi uthole umbiko kozakwabo mhla ziyisi-8 kuNhlaba (May) wezi-2015 ukuthi sezimkhalele uMnu Mthembu.
Umshushisi, u-Adv Krishen Shah, ubuze uW/O Yaka ukuthi ngabe sikhona isitatimende esibhalwe nguMnu Mthembu. Uthe cha akabhalanga sitatimende njengoba ekhethe ukuthula.
Ummeli kaMnu Mthembu, u-Adv Rajendra Nathalal, ubuze uW/O Yaka ukuthi uthe iklilayenti lakhe liboshwe mhla ziyisi-8 kuNhlaba wezi-2015, ngabe ulihlomile yini ngemibuzo.
Uthe akasakhumbuli ngoba ngalolu suku ubophe uMnu Mchunu. Umbuze ukuthi ngabe walibuza yini ikilayenti lakhe ukuthi belikuphi ngosuku lwesigameko. Uthe akasakhumbuli. UMnu Mthembu uyawaphika womane amacala athweswe wona. Icala liyaqhubeka.