KUNIKELELWE ABAFUNDI NGEZINCWADI KWAZULU-NATAL
IPHUME umkhankaso wokunikelela izikole ngezincwadi - ikakhulukazi ezasemakhaya - inhlangano engayenzi inzuzo, iDancing Pencils Literacy Development Project.
Lokhu ikwenzela ukukhuthaza abafundi ukuba babhale futhi bafunde. Umsunguli wale nhlangano, uNkk Felicity Keats (84), uthi kusukela ebuncaneni bakhe ubenesifiso sokuphonsa itshe esivivaneni kwezemfundo. Uthi kunezinkampani zabashicileli acela kuzona izincwadi ezingasasetshenziswa bese enikela ngazo ezikoleni ngenhloso yokugqugquzela isiko lokubhala nokufunda, aphinde afundise ukubhala kulabo abenza amabanga aphansi.
Utshele ILANGA ukuthi lokhu ukwenza ezikoleni zamabanga aphansi kuze kuyophuma kwaphezulu. “Kulo nyaka sesinikele ngezincwadi ezivile kwezingama-470 ezikoleni ezine KwaZulu-Natal, okuyiGlencore High, Ndwendwe, Sogidi Primary, Malibela High School kanti zingaphezulu kwama-160 ezaseNgwavuma ezihlomulile okubalwa kuzona iNqobizazi Secondary.
INqobizazi ithumele izingane ezili-17 zayoqeqeshwa, zihambisana nothisha wazo ozozisiza acophelele ukuthi zizisebenzisa kahle izincwadi esinikele ngazo,” kusho uNkk Keats.
Uveze ukuthi emuva kokuqhamuka kwabo nalolu hlelo, sinciphe kakhulu isibalo sabafundi abangakuthokezeli ukuba sesikoleni futhi bayancintisana ngokwenza kahle.
Uthi izincwadi abazonikela ngazo ngonyaka ozayo zizokwethulwa mhla ziyisi-9 kuMandulo (September) nonyaka eBat Centre.
Banesifiso sokusebenzisana nomasipala abaningi, ikakhulukazi KwaZulu-Natal, osomabhizinisi, yizinkampani ezahlukene neminyango ethintekayo ekwenzeni ngcono imiphakathi.