AKUBONA BONKE ABANTU BESILISA ABAYI- TRASH
KUVUKE isibibithwane uma ngikhumbula umbhalo wesiwula esithi # AllMenAreTrash emuva kokuba kubulawe ngesihluku uKarabo Mokoena. Ake ngiyisho ngesiNguni-ke le nto, lo muntu uthi wonke amadoda angodoti!
Noma ngabe kuthiwa la mazwi ashiwo nguShembe, uJesu ngisho uNturunturu imbala owazibonelwa nguKwedini owayehlala ngakwami KwaPhindaphume, eMariannhill, bengizobatshela lokhu: Ngikhumbula ngomunye unyaka, ngiyacabanga ukuthi bekungowezi-2007 noma owezi-2008. Bekunengqungquthela yokukhetha ubuholi beNkatha Freedom Party Youth Brigade laphaya ehholo eMandleni-Matleng, oNdini kubanga u-Irvin Barnes noThulasizwe Buthelezi.
Ngaleso sikhathi bekuneculo ebelikhonzwe kakhulu yi-African National Congress Youth League elithi: “Yonke le minyaka - yonke le minyak’ uZum’ ezabalaz’ uGash wayenway’ amasende…”
Kule ngqungquthela engikhuluma nga-yo, iNkosi Man go Sooth Bothless okwakubhekiswe kuyona la magama, yathi:
“Uma kuwukuthi ukwakha kwami amakolishi ukuze abantu bakithi bafunde, kwakuwukunwaya amasende, ngizoqhubeka ngiwanwaye.
Uma kuwukuthi ukwakha izimboni ukuze abantu bakithi basebenze, kwakuwukunwaya amasende, ngizoqhubeka nginwaye….” yasho kanje bakithi kayishongo ukuthi ngamankwahla.
Kuningi eyakubala. Ngithi-ke ake nginyathele emazwini alo mholi. Uma kuwukuthi ukuthanda ugogo wami uMaShabane, ugogo wami uNorah Mthembu ongase- kho, o-anti bami nomama wami uNtongolozi kungenza ngibe yitrash, kulungile ngizoqhubeka nokuba yi- trash.
Uma ukufundisa amadodakazi ami, ngiwabekele nenkece yokuba uma eseya enyuvesi angalokhu ekhangeza iminikelo, ngiwabekele nemali yokuba uma kwenzeka uMdali engishayela ucingo ethi ngiyadingeka eHeavenmontvilleBoroughbergstad asale angalambi kuwukuba yi-trash, ngizoqhubeka nokuba yiyona.
Uma kungukuthi umama ongizalayo ngimenzela igilosa njalo uma ngiholile, lokho qualifies me as trash, ngizoqhubeka ngibe yi- trash. Uma kuwubu- trash ukusiza umama wakwamakhelwane owashonelwa ngumyeni wakhe uma efika ezokhala kimina ethi nakhu bebulawa yinkemane, ngizoqhubeka nokuba yi- trash.
Uma ukuthengela indodakazi kasibali wami wesifazane ukudla kwengane engingayazi nokuthi ngeyakwabani kungenza ngibe yitrash, ngizoqhubeka nokuba yitrash. Uma kuwukuthi ukuhlonipha umkami, ngimvikele, kungenza ngibe yi- trash, ngizoqhubeka nokuba yi- trash.
Uyazi kwavele kwathi mangikhale izinyembezi ezingagcwala ibhakede njengoba ngibhala lolu daba kodwa sekusho khona nje ukuthi uMasipala weTheku uyasikhumbuza ukuthi Save Water.
Uma kuwubu-trash ukuhlale ngikhumbula othisha bami, uMrs Mhlongo (unina weMeya yase-Mhlathuze), uMrs Mnguni, uMiss Mthethwa (Qambokwethu Primary School), uMrs Dladla, uMiss Sibisi, uMiss Mahlase (KwaKhandisa HP School) , uMrs Enicker noMrs Ngcongo (Zwelethu High School), uMiss Sithebe (oNgoye High School), UMrs Zulu (Thanduyise High School) yize wangiqhatha nothishomkhulu uZikhali owangishaya ngesibhakela emakhaleni ngavuza igazi, kulungile mazilime ziye etsheni ziyobhajwa khona, ngizoqhubeka nokuba yi- trash.
Uma ukuhlonipha ozakwethu oMakhosi Dube, Mpume Sibiya, Thandi Zondi, Pamela Zungu (ngibala laba abangakathathwa) kungenza ngibe yi- trash, impela makube njalo.
Uma kuwukuba yi- trash ukuthi bengishayelela omunye uzakwethu oshadile ebusuku, kungafiki nje engqondweni yami ukuthi ngicele ukuba sintshontshelane ngoba uMprofethi Isaiah Shembe, okwakuyindoda, wangifundisa ukuthi intombi esiganile ngingayibheki nokuyibheka yisono esibi leso, ngizoqhubeka nokuba yitrash.
Uma ngiyi- trash ngokuthi ngicwile ezikweletini kuyimanje nje ngoba ngaboleka inkece ebhange ukuze udadewethu ayokhokha imali yasemsebenzini ayeyithathile esehluleka wukuyikhokha, ngizoqhubeka nokuba yi- trash.
Uma kuwukuba yi- trash ukuthi ngasiza ingoduso yomfowethu wakwamakhelwane ngayiyisa esibhedlela ngemoto yakithi mahhala, iyobeletha phakathi kwamabili - kumanje nje elinye igama laleyo ngane nguNtatheli (ngenxa yami) - ngizoqhubeka ngibe yi-trash.
Uma kuwubu- trash ukuthi udadewethu uVuyiswa ozalwa nguMaMkhize le eBotha’s Hill okunguyena kuphela engimaziyo ezinganeni zikababa ngimhlonipha sengathi nguyena owazala uMprophethi Isaiah Shembe, kulungile baba ngizoqhubeka ngibe yi-trash.
Uma kuwubu- trash ukuthi intokazi yaphesheya kweNkonjane ngakithi KwaDlangezwa, uNomvuzo Mjadu osekuphele iminyaka engama-27 ngiyithanda ngayihlonipha uma ingitshela ukuthi mangikhohlwe yiyona ngisho ngabe ngiyithanda kangakanani ngoba inomuntu wayo kanti nami sengithathile, ngizoqhubeka nokuba yitrash.
Uma ngiyi- trash ngokuthi intokazi engiphethe emsebenzini, uThobile Nxumalo ,ngiyihlonipha sengathi ngumama ongizalayo (uNtongolozi) or isalukazi esizala ubaba (uMaShabane), impela ngizoqhubeka nokuba yi-trash.
Uma kuwubu- trash ukuthi uJesu wafela bonke abantu ngisho nabesifazane, uMprofethi Isaiah Shembe wayephulukisa nabesifazane, ngizoqhubeka ngibe yi-trash. Masimtshele-ke thina boRev Mkhekhelezi lo muntu obhale lo mbhobe we-# AllMenAreTrash ukuthi uyi- trash ewu-first grade ngoba uzalwa yi- trash enguyise, uyisemkhulu uyitrash, abafowabo bayi- trash. Angathi uma kugcwele ama- trash kubo acabange ukuthi yonke imizi inama- trash.
Kunamadoda akhulisa izingane zamantombazane ngawodwa, kunamadoda afayo evikela abantu besifazane njengoMandla Hlatshwayo lo owake wadlala kwiGenerations. Abantu mabayeke ukubhorekela kuma-social network ngezinto abangazazi.
Uma singaziyeka zonke lezi zinto ezinhle esizenzela abantu besifazane, kungagcina sekufundwa ngathi iMaths kuthiwe # AllMenAreTrash x2= Devil!
Akubona bonke abantu besilisa abayi- trash njengoba ekhona amatrash esifazane uma kuwukuthi lesi siphungumangathi esibhale le mbudane kasazi. Siyamazi uMagoso owabulalisa indoda yakhe ngoba efuna imishwalense?
Bangaki abantu besilisa abondliswa izingane okungezona ezabo bengazi? Bangaki abantu besilisa abadlisiwe intombazane iqonywe ngapha nangapha sengathi amadoda asendalini?
Kulabo bantu besilisa abahlukumeza abesifazane, ngithi, siyohlangana eSikhaleni (eSikhawini) KwaMncwabe ezitolo ngoba kunjena nje, sibizwa ngodoti, yibona. Nohulumeni siyacela ukuba uke nje Nkosi yami usebenzise i-sharia law inyanga nje ibe yinye, lezi zinswelaboya ezihlukumeza zibulale abesifazane, ziyogoba njengentombazane, leli thuluzi lokubhoncula izipikili.
Hikhensile ngopfu ma-Afrika! mkhekhelezi@webmail.co.za
Bangaki abantu besilisa abondliswa izingane okungezona ezabo? Ba...