Izaba zokulwa nomkhuhlane
SESIFIKILE isikhathi sasebusika nemikhuhlane ehambisana nabo. Namuhla sizothinta kafushane izaba ongazenza usekhaya zokulwa nomkhuhlane, ungakayi kodokotela ukuyokhipha izimali ezishisiwe.
Lapha sikhuluma ngomkhuhlane ovamile, hhayi lena yanamuhla eseyawela izilwandle ngamabhanoyi nangomoya, osekwaze kwaba nemigomo eyenziwa ngisho umuntu engakahlabeki.
Siyazazi sonke izimpawu zomkhuhlane ezivele zikubangele usizi lapho usukhwehlela, uthimula unganqamuki, kuqaqambe nomphimbo kube njeya. Nazi-ke ezinye zalezo zaba:
1. Thola okuphuzwayo
Umkhuhlane wenza umzimba ulahlekelwe ngamanzi, ikakhulukazi uma uphalaza noma unesihudo. Phuza amanzi aneleyo kumbe iziphuzo ezenziwe ngezithelo. Nokho ikhofi nezinye iziphuzo ezine- caf
feine uyazigwema ngoba ziyachamisa.
Itiye elinoju liyasiza ekuthobeni umphimbo obuhlungu. Uma uzwa kucanuzela inhliziyo, isiphuzo lesi usiqhabula kancane ukuze ungabuyisi. Uzobona ngani ukuthi umzimba uthola amanzi aneleyo? Uzobona ngomshobingo ocwengekile noma ophuzi ngokuphaphathekile. Utshwala bona? Kabulokothwa!
2. Phuza isobho (umhluzi)
Sekuyiminyaka ngeminyaka abazali benzela abantwana umhluzi wenkukhu uma bengenwa wumkhuhlane. Sekuke kwenziwa ucwaningo ngalokhu ngabephephabhuku iChest kwavela ukuthi umhluzi wenkukhu uyasiza enkingeni yomphimbo ohlaselwe wumkhuhlane.
Nokho imibono yodokotela iye- hluka ngoba abanye bathi nguwena njena osuke uzizwa ukahle, hhayi ngoba usuke usudlulile umkhuhlane.
3. Lalela umzimba wakho
Uma umzimba wakho ukutshela ukuthi ungawugqilazi ngokuzivocavoca, wulalele. Uma uzwa kuthi lala usuku lonke, yenza njalo.
Ungaqhubeki nemisebenzi yonke yemihla ngemihla uma unezimpawu zomkhuhlane. Ukuphumula ngenye yezindlela zokulekelela umzimba ukuba ulwe nokuhlaselwa wumkhuhlane. Ungalo- kothi weqiwe yisikhathi sokulala ebusuku ngoba ukulala kahle amahora ayisi-8 ebusuku kumqoka.
4. Umswakama
Ukuphefumula umoya oswakeme kuyasiza ekuvuleni amakhala nomphimbo obuhlungu. Iqhinga elihle wukuba uphefumule umoya onesisi samanzi afudumele.
Nokuzivalela nje egunjini lokugezela okuphuma amanzi ashisayo eshawa kulona bese uphefumula isisi imizuzu embalwa, lokho kwanele.
5. Ukuzigquma
Ukuvimbana emakhaleni nasemphinjeni ungakwelapha ngokubilisa amanzi bese uyalisusa ibhodwe eziko maqede uzimboze ngethawula elikhulu uvale amehlo.
Hosha umoya kakhulu ngawo amakhala avimbene imizuzwana engama-30.
Udokotela David Keif-er ongumqeqeshi wezokwelapha e-University of Washington School of Medicine, e-United States of America (USA), uthi ungaconsisela i-eucalyptus oil. Phinda lokhu uze uwuzwe umahluko.
6. Indwangu efudumele
Beka indwangu efudumele emanzi phezu kwekhala nesiphongo. Indwangu efudumele iyasiza kakhulu uma kubuhlungu ikhanda.
7. Thola okumuncwayo
Amaphilisi omphimbo amuncwayo ( lozenges), ayasiza uma umphimbo ubuhlungu. Abanye bancoma awezinc ekutholeni imiphumela esheshayo yokwelapheka komkhuhlane.
8. Hahaza
Ukuhahaza ngamanzi anosawoti bese uyaphimisa, kuyasiza ekukhucululeni amafinyila nezikhwehlela emuva nomphimbo, ikakhulukazi uma kade ulele. Kuyazivula nezindlebe ezivalekile.
9. Hlanza amakhala
Ukuconsisela umuthi emakhaleni kuyasiza uma ucindezelwe yisinus. Amanzi afudumele anosawoti ungawaconsisela embotsheni eyodwa yekhala bese uwakhipha ngenye.
10. Thola ozokunakekela
Kuyasiza ukuba nozokunakekela ngokukunikeza izidingo usembhedeni. Uma unomhlobo noma omunye womndeni ozokwenzela lokho, zibale njengobusisiwe ngoba kuyasiza kakhulu.