Ukwanda kwaliwa wumthakathi bantu baseNquthu
MHLELI: Akuvumi ngithule ngesenzo esihle esenziwe wumphakathi waseNquthu namaphethelo ngokuvotela iNkatha Freedom Party (IFP) okhethweni lokuchibiyela lapho sithole khona izigceme ezili-14.
Sibonga uNkulunkulu owadala izulu nomhlaba ngokulalela imikhuleko yabantu baseNquthu. Into eyenziwe wumphakathi wakhona ikhombise ukwethemba i-IFP nomholi wethu uMntwana waKwaPhindangene, iNkosi Mangosuthu Buthelezi, yenza sizizwe sithobeke kakhulu.
Ngibonga uMntwana waKwaPhindangene ngokuzinikeza isikhathi nokuzikhandla kwakhe ukuba ayolekelela amalunga eNkatha nomphakathi kunqunyelwa ogodweni i-African National Congress (ANC) isenzisa uhulumeni wesifundazwe ukuxhaphaza abantu baseNquthu naseMzinyathi.
Imiphumela yokhetho ibe wubufakazi obuqanda ikhanda ukuthi uMntwana waKwaPhindangene uyingqwayingqwayi, inkunzi emidwayidwa kwezombusazwe futhi akaze asenge ezimithiyo ngokuthi uma ekhuluma nabantu abathembise izulu nomhlaba.
Selokhu kwathi nhlo, ngisho esaphethe uhulumeni waKwaZulu akaze akhe inqaba emoyeni. Siyabonga futhi ukuthi abantu baseNquthu baye bazigeqa kahle izindlebe bamlalelisisa uMengameli Jacob Zuma kade ehambele kuleya ndawo eyokhankasela iqembu lakhe lapho ebanxuse khona ukuthi bangalivoteli iqembu elingeke libenzele lutho, nangempela-ke kube njengamagama enkehli abantu bavotela iqembu elizobanika intuthuko, bayeka elingenamsebenzi kodwa eligcwele inkohlakalo.
Ukunqoba kwe-IFP eNquthu kuyizinkomba zokwembuleka kwesahluko esisha ezimpilweni zezakhamizi zakule ndawo naseMzinyathi wonkana. Phela kuliqiniso elingephikwe ukuthi manje umphakathi waseNquthu usuzothola izidingo zentuthuko njengoba besekuphele izinyanga ezili-10 zonke intuthuko ingayi kubantu ngenxa nje yeqembu elibusayo elikhombise ukuba nomhobholo ngemuva kokhetho lohulumeni basekhaya ngonyaka odlule ngoba nakhu i-IFP ibizophatha uMasipala waseNquthu nowesiFunda waseMzinyathi.
UNgqongqoshe wezokuBusa ngokuBambisana nezoMdabu, uNkk uNomusa Dube-Ncube nonyawo lwakhe olunomnkenke wezombusazwe, wenze ukuba umasipala uhlakazwe kungekho sidingo ukuze kuzoqalwa phansi ukhetho khona iqembu lakhe lizocanasa kahle kumasipala ngenhloso yokuzitamuzela amathenda. Ukunqoba kweNkatha eNquthu kuyizinkomba zokuthi lukhulu luyeza luyanyelela ngokhetho lukazwelonke ngonyaka wezi-2019.
Amakhansela ethu azosebenza ngokuzikhandla, ngeke ahlale phansi athi dekle ngoba nakhu sidle umhlanganiso okhethweni. Uma engenza njalo, kuyobe sizigwaze ngowethu ngoba izimbangi zethu ziyongena ngenxeba njengempethu. Ukuphatha umasipala ngobuqotho ngaphandle kwenkohlakalo nokuthunyelwa kwezidingo kubantu yikhona okuseqhulwini emakhanseleni ethu.
Ngabe ngenza iphutha elikhulu uma ngingedlulisi amazwi ami enduduzo mayelana nesibhicongo senhlekelele esivelele iqembu elibusayo ngokuthi libhulelwe esakeni kuhle kwamabele yiNkatha kulolu khetho lokuchibiyela lwaseNquthu.
Kufikisela nomunyu ukuthi iqembu likaKhongolose lihluleke lancama selithumele ngisho iLuthuli House uqobo ebinkanise nxazonke eNquthu, abanye ongqongqoshe besifundazwe baze bagwazela umphakathi nangezimvu kodwa labuya lilambatha.
Lokhu okwehlele i-ANC kumele kube yisifundo sokuthi abantu sebeyabona ukuthi lolu hlelo lukandunankulu lukaSukuma Sakhe i-ANC, kalwenzelwanga ukuhlomulisa umphakathi kepha luyithuluzi lokugaya amavoti kubantu kodwa kube kuthiwa kuhanjiswa intuthuko. Ngiyasicabanga nje isibibithwane kozakwethu abakwi-ANC njengoba phela bebesembhidlangweni wokusinyundela kubantu baseNquthu ngokuthi bathi sekusele umndondo eNkatheni.
Sithi akwehlanga lungehliyo kumalungu eqembu elibusayo ikakhulukazi ozakwethu esisebenza nabo njengamaLungu eSishayamthetho saKwaZulu-Natali njengoba bonke nongqongqoshe beholwa uNdunankulu ububona ngezintuli bebheke eNquthu bethwele besikizela nezijumbana zokudla beyoncenga amavoti kubantu.
Ngithi yobe futhi kuNgqongqoshe weZokubusa ngokuBambisana, uMhlonishwa uNomusa Dube-Ncube ngokuthi kungaphumeleli isifiso sakhe sokuthi bakwazi ukuphatha uMkhandlu waseMzinyathi ukuze phela kuhlomule iqembu lakhe ngethenda yamanzi. Phela uKhongolose ubufuna ukudla mfundambili njengemboma. Ngiphinde ngithi dudu kuMnu uLucky Moloi ngoba ubeseze wakulungela ukuba yiMeya ngoba esekwa ikhabhinethi yaKwaZuluNatal.
Ngingemshiye ngaphandle uMnu uSihle Zikalala ngoba okubuhlungu wukuthi unenkani embi efana neyeselesele lingafuni ukuphuma endlini kanti ukhulumela futhi kuhle komuntu owake waphupha esha nendlu. Enjalo nje umandla ekuthatheleni abanye abantu izinqumo engaxoxile nabo. Lokhu abekwenzile kakuhlukile nokusongela inkomo ingakahlatshwa. Impi yakhe abeyiphakile ukuthi iyohlasela eNquthu ibuye ilambatha.
Vele isidingo sokuhlakaza umasipala besingekho kodwa inhloso yakhe bekuwukuchoba iNkatha kuhle kwentwala. Kumanje insema isimi ngokhande kuMnu uZikalala. Ngiyethemba ukuthi uyafa zidubulo uMnu uMdumiseni Ntuli okhulumela i-ANC ngoba ungomunye wabantu abebesemshikashikeni wokunyudela iNkatha njengoba ubekhuluma aze akhihlize amagwebu kodwa kunamhlanje amathe abuyele kwasifuba.
Kuyaziwa ukuthi ungomunye wabantu okuthi uma bekhuluma ngeqembu leNkatha banyukwe isilungulela.