Ivaleliswe ngomthandazo iThongathi FC
IBHOLA: Izimisele ngokwandisa awaKwaZulu-Natal kwiNFD
ICELELWE indlela enhle kuNkulunkulu iThongathi FC ezomela iKwaZulu-Natal emidlalweni kazwelonke yeABC Motsepe League yokulwela ukunyukela kwiNational First Division (NFD.
Imidlalo yokuhlunga izoqala mhla ziyisi-5 isongwe zili-11 kuNhlangulana (June) eMonti, e-Eastern Cape, kanti amakilabhu azogadulisana kule midlalo azoqhathwa kusasa ngoLwesibili eGoli.
Ngaphambi kokuba iThongathi FC ilibangise kule midlalo, kubanjwe inkonzo ehholo lomphakathi wasoThongathi izolo. Le nkonzo ibihlelwe ngabaphathi bale kilabhu eholwa nguNico Mkhize osembonini yamatekisi.
UNkosinathi Chili ongomunye wabanikazi beThongathi, utshele ILANGA ukuthi konke sekumi ngomumo ngamalungiselelo okumela isifundazwe ngegiya elihle kule midlalo. Uthi banelikhulu ithemba lokuthi bazokwazi ukuhamba ezi- nyathelweni zeReal Kings United yaseMophela ngaseHammarsdale emele isifundazwe kahle ngesizini edlule.
IKings isigijima kwiNFD kanti isonge isizini isendaweni enhle njengoba ibingabalwa namakilabhu avika izembe yize bekuyisizini yayo yokuqala kwiNFD.
IKings ibivele ibanga neThongathi FC ngesikhathi la makilabhu esagijima ndawonye kwiMotsepe League okwenze abafana bakaNico baziphuzela umsobho ngesikhathi sezihambile izimbangi zabo ezinkulu. Bathole ugqozi kuyona iKings lokwenza kahle.
UChili uthi isizini yokuqala kwiMotsepe League ibasizile kakhulu ukufunda okuningi kulesi sigaba. Uthi yingakho bekwazile ukuhlanganisa inqanawe yekilabhu ebhubhise kwasani kule sizini yabo yesibili kulesi sigaba.
Uthi bayakuqonda ukuthi irekhodi elihle elishiywe yiKings kakulula ukuliphula kodwa bazozama ngawo wonke amandla ukusika iphethini. Uthi okubathokozi- sile wukuthola ukwesekwa kuwo wonke amakilabhu akulesi sifundazwe abebebanga nawo.
UChili uthe: “Kasizimisele nakancane ngokuyoveza ubuso. Sifuna ukunyukela kwiNFD kodwa kumele sisebenze kanzima ukufeza leli phupho. Sinxusa osomabhizinisi ngokwehlukana ukuthi bafake isandla esivivaneni ukuze sikwazi ukuthwala nabalandeli ukuyosifaka ugqozi kule midlalo yokuhlunga.”
USphamandla Mtolo ongukaputeni weThongathi uzwakalise okukhulu ukuzethemba ezakhe ukuthi ngeke ziphoxe kule midlalo.
Uthi okubaqinisa nakakhulu idolo wukuthi bagabe nabangabadlali abanesipiliyoni sale midlalo kubalwa uSiyabonga “Villa” Vilane, uPatrick Meso okhuliswe yiMamelodi Sundowns ezinhlakeni zayo, u-Ayanda Mbatha, uNgcebo “Mnceks” Zulu noPhilani “Wele” Gumede ukubala nje abambalwa.
URonnie Naicker ocija le kilabhu, uthi okuhle wukuthi uzazi kahle izimbangi azobhekana nazo kule midlalo.
“Kukhona okuhlabahlosile okubekelwe abadlali ukubakhuthaza ukwenza kahle kule midlalo. Okuhle wukuthi izikhulu zekilabhu zisebenza ubusuku nemini ukugcina konke kuhamba ngononina,” kusho uNaicker osanda kuphothula izifundo zeCAF A Licence ekubeni unoxhaxha lwezitifiketi kubalwa nasithole eBrazil.
UNaicker uthi ubona ezakhe zizonqoba njengoba zithole nezibusiso kuwo wonke amakilabhu azwakalise ukuthi alibeke ngesihloko elokuthi kumele iThongathi FC ihambe ingabe isabuya kulesi sigaba ngoba kayishayeki, iyasivulela isibhaxu ekhaya nasekuhambeni.
Le kilabhu igabe nangoPhilani “Silwane” Mkhize osethimbeni labaqeqeshi okwenza ibhentshi layo liqine kakhulu. UMkhize akayena umafikizolo kwezokuqeqesha kwazise useke waya emidlalweni yokuhlunga ehamba neMilford FC yaseRichards Bay.