IBUYISE ISITHUNZI I-KINGDOM STARS INQOBA

IBUYISE isithunzi iKingdom Stars emele iKwaZulu-Natal kwiBrutal Fruit Netball Premier League eqale ngenyanga edlule eThekwini yafudukela eCape Town eWestern Cape njengoba isiseMangaung, eFree State.

IStars inqobe okokuqala ngqa eFree State ibhaxabula iSunbirds ngo-44-36 ngoLwesihlanu kwathi ngoMgqibelo yabukisa ngeDiamond iyitalabha ngo-67-30.

IStars iye kule midlalo izinto zingayihambeli kahle njengoba beyinephuzu elilodwa emidlalweni eyisi-7.

Ithole iphuzu idlala ngokulingana neBaobabs eThekwini ngenyanga edlule yase ithelwa induku kweyisi-6.

Lishone elayizolo ngeSonto iStars inamaphuzu ayisi-5 emidlalweni eyisi-9 kanti ibisihleli endaweni yesi-7.

Ngempelasonto kuzogijinywa imidlalo yomkhumulajezi lapho iStars izotholana khona phezulu neDiamonds ebambe indawo ye-10 kwi- log yale midlalo.

Kulo mdlalo kulindeleke ukuba iStars izidlele amahlanga kwazise iDiamonds kayikaze inqobe ngisho owodwa umdlalo.

Isiyonke imiphumela yemidlalo yangempelasonto esiphuma kuyona yeBrutal Fruit ihambe kanje: Crinums 76, Diamonds 11; Kingdom Stars 44, Sunbirds 36; Stings 64, Sunbirds 25; Diamond 30, Kingdom Stars 67; Jaguars 56, Fireballs 49; Aloes 51, Baobabs 44; Flames 49, Stings 44.