ABODUMO KWI-PSL NEMIDLALO EMANDENI
KULINDELEKE iqophelo eliphezulu emidlalweni yezinkampani zakwaSithebe, eMandeni, njengoba kuhlelwe umqhudelwano webhola ukukhuthaza izisebenzi ngokubaluleka kokunyakaziza umzimba.
ULawrence Ncala ozakhele udumo evimbela iLamontville Golden Arrows namaZulu FC noFana Mbatha odlale kwiBloemfontein Celtic basungule umqhudelwano webhola obizwa ngeMandeni Industrial Tournament ozoqala ngoMgqibelo ngo-7 ekuseni eNgcede Omhlophe Stadium nasezinkundleni zaKwaTasi khona eMandeni.
Kuzoshukana amakilabhu angama-20 abunjwe yizisebenzi zezinkampani ezahlukene zakwaSithebe. Lo mqhudelwano kuzokube kungokwesibili ugijinywa njengoba nangonyaka owedlule udlaliwe. Kuthiwa izisebenzi zikhombise ukuyithokozela le midlalo yingakho nanonyaka uzogijinywa.
UMbatha ongomunye wabagqugquzeli bale midlalo, uthi balindele izinga eliphezulu nonyaka.
“Izisebenzi zikhombisa ukuyithokozela le midlalo yingakho silindele ibhola eliseqophelweni eliphezulu. Kodwa-ke inhloso enkulu ngawo wukukhuthaza ukuzivocavoca nokwakha umoya wobumbano,” kusho uMbatha othi kuzophinde kushukane abesifazane kwi-netball.
Ikilabhu ezodla ubhedu izothola inkomishi, yijezi, yizinkomishi ezincane zomdlali ngamunye ezingama-25 nevawusha ka-R1 700 yasebhusha. Ozolala isibili uzothola inkomishi, izindondo zesiliva nevawusha ka-R1000 yasebhusha.
Kwi-netball onqobile uzothola inkomishi, yizindondo zegolide nevawusha ka-R500 yasebhusha, bese kuthi olale isibili athole inkomishi nezindondo zesiliva. Kuzophinde kuklonyeliswe abadlali ngabodwana abenze kahle.