Ihlalelwe yijoka elinzima iPirates
UJonevret udinwe uyaqhuma ngabadlali
IDINGA inselelo enzima i-Orlando Pirates ephoxe abalandeli bayo ihluleka ukungena kwi-top 8 iguqiswa yiLamontville Golden Arrows ngo-2-1 kowokugcina we-Absa Premiership ngoMgqibelo ntambama eMoses Mabhida Stadium, eThekwini.
UKjell Jonevret ongumqeqeshi weBucs - obedinwe eqhuma ngemuva kwalo mdlalo - ulibeke ngesihloko elokuthi umphuphe webhola abawugijime bebhekene ne-Arrows ngeke ubenze basonge isizini ngegiya eliphezulu.
Uthi akafuni ukwenza izaba ngesimo sezulu kwazise belinomoya.
“Kumele ngilungise isimo ngaphambi komdlalo wamanqamu weNedbank Cup esizowugijima neSuperSport United mhla zingama-24 kuNhlangulana (June). Kumele ngiqikelele ukuthi siqhamuka nohlelo lwemidlalo enzima esizozicija ngayo ngaphambi koweSuperSport.
"Kumele sifike kuwona sesiwalungise wonke amaphutha ukusonga kahle isizini,” kusho uJonevret.
Uthi abadlali bakhe bazenzele okuthandwa yibona kulo mdlalo emuva kokuhamba phambili ngegoli likaThamsanqa Gabuza elingene ngomzuzu we-19. Leli goli licinywe ngelikaLerato Lamola elingene ngomzuzu wama59 kwathi uKnox Mutizwa walibhakuzisa ngowama-90.
Uthi mhlawumbe kuzophoqeleka ukuthi ngithathe abadlali bami siyohlala ebhishi ngaphambi komdlalo wamanqamu ukujwayela kahle umoya waseThekwini.
Kuqaphelekile emuva komdlalo ukuthi nabadlali beBucs bebephoxekile ngokuhluleka ukungena kwi- top 8.
Nokho baye kulo mdlalo vele sekucacile ukuthi wumlingo kuphela ongabafaka kwi- top 8 kwazise kule sizini bebesemkhankasweni wokuphisana ngamaphuzu.