UHLABEKE UMXHWELE UMGADLI WE-CHIEFS
UGEZEKE igilo ngakubone eNingizimu Afrika umdlali weKaizer Chiefs ongowokuhamba okusabhekwe lukhulu kuyena.
IChiefs isayinise uGustavo Paez ongumgadli waseVenezuela maphakathi nesizini. Lo mdlali selokhu efikile ukhombisa izimpawu zokuba ngumgadli okhaliphile yize egibele inqola isihambe ibanga elide.
UPaez ushaye igoli elenze iChiefs yasonga isizini ngewini ihlula iBidvest Wits eyizingqwele ze-Absa Premiership ngo-1-0 ngoMgqibelo ntambama eFNB Stadium, eSoweto. Lo mdlali akawuvali umlomo ngakubone kuleli.
“Ngesikhathi ngitshelwa ngabaphathi bami ngeNingizimu Afrika benginovalo ngizitshela ukuthi ngiya eligini engasile kodwa ngigezeke igilo sengifika kuleli. Ngisho iligi yasezweni lami kayifiki ngokwezinga kweyakuleli. Ibhola elidlalwayo licishe lifane nelethu kodwa ezinye izinto ziseqophelweni eliphezulu uma uziqhathanisa nezasezweni lami. Sengikulangazelele ukuqala kwe- sizini entsha,” kusho lo mdlali.
Nokho uthi akumjabulisanga neze ukuthi ezakhe zisonge isizini zinganqobanga nkomishi.
“Ngifike ngatshelwa ukuthi iChiefs yikilabhu enkulu ngakhoke kubalulekile ukuthi ngesizini kube khona ekunqobayo.
Ngizibonele nami, uzwa ngengcindezi uma ungena enkundleni. Ngiphoxekile uma singanqobi lutho kodwa nginethemba lokuthi ngesizini ezayo sizowola izinkomishi. Nami ngokunjalo ngizimisele ngokwenza kangcono ngoba ngizokube ngiqale kahle phansi nekilabhu,” kusho uPaez.