ISISHIYWA NGABAXHASI ABAMQOKA IKILABHU YE-PSL
LINGASE ligqabuke ifindo lomshado weminyaka phakathi kweBloemfontein Celtic nabakwaMTN abangabaxhasi bayo njengoba kuvela ukuthi lesi sikhondlakhondla senkampani yezokuxhumana sikhala ngokushodelwa yimali.
IBloemfontein Celtic isindile ezembeni emuva kokubambana neMaritzburg United ngo-1-1 koweligi ngoMgqibelo ntambama eHarry Gwala Stadium, eMgungundlovu.
ICeltic yiyona ebone imbobo yepali kuqala ngegoli elishaywe nguMusa Nyatama lacinywa ngelikaMohau Mokete.
ILANGA lihletshelwe yimithombo yalo engaphakathi kwiCeltic ukuthi le kilabhu isiqalile ukuthungatha abaxhasi abasha njengoba uMTN obaxhasile usubatshelile ukuthi ngeke usabeseka ngemali ngenxa yokuxega kwesimo somnotho.
Lo mthombo uthe: “Nakuba ngi- ngenaso kahle isiqiniseko sokuthi isivumelwano sabo siphela ngale sizini yini noma ngezayo kodwa uMTN usuyazisile iCeltic ukuthi ngeke usaqhubeka nokuyeseka ngemali ngenxa yokuxega kwesimo somnotho.
“Njengoba ngikhuluma nawe nje izikhulu zayo seziqalile zithungatha abaxhasi abasha ngoba ikilabhu izodonsa kanzima uma ingase ingabatholi abanye.
"Kodwa-ke uhulumeli waseFree State kukhona ozosiza ngakho amakilabhu akule ndawo okubalwa kuwo neFree State Stars okungakacaci noma izodayiswa yini noma cha ngoba umnikazi wayo uMike Mokoena useshayeka ephaketheni njengoba ikilabhu yakhe ingasenabo abaxhasi,” kusho lo mthombo.
Leli phephandaba lithinta uKhumbulani Konco oyisikhulu esiphezulu seCeltic ngalolu daba, ucele ukungaphawuli ngalo okwamanje ekhala ngokuthi lubucayi kakhulu.