Imizamo yoSuthu ingaqeda nya ngeThanda
Izikhulu kazifuni ukuphawula ngalolu daba
IMIZAMO yabaphathi bamaZulu FC yokuthenga igunya leThanda Royal Zulu lokudlala kwi-Absa Premiership kuputshuke ukuthi izoqeda nya ngegama lale kilabhu edume ngelamaBhubesi uma kugcina ngokuvunyelwana.
ILANGA lithole ukuthi izikhulu zoSuthu zisezingxoxweni esezikuvuthondaba nabaphathi beThanda ukudayiselana ngelungelo lokudlala esigabeni esikhulu. Kuthiwa uSuthu luzimisele ngokuhlukana no-R60 million. USuthu luzophi- nda ludedele nelungelo lalo lokudlala kwiNational First Division (NFD).
Kuthiwa kulo R60 million ozokhokhwa wuSuthu, uPierre Delvaux ongumnikazi weThanda uzothatha ingxenye enkulu yakhe bese ededela imali encane kwabambisene nabo kanjalo nelungelo lokudlala kwiNFD.
Kuthiwa izikhulu ezinamasheya amancane kaziyifuni nokuyizwa eyokuqhubeka negama leThanda uma kugcina ngokuphasa lokhu kudayiselana.
Kuthiwa zibona ukusebenzisa igama leThanda kuzonyanyisa na- kakhulu umphakathi waseRichards Bay namaphethelo oseke le kilabhu kunzima itabalasa kwiNFD kwaze kwaba inyukela esigabeni esikhulu ngokuphela kwesizini.
Nokho abathintekayo kulolu daba kabafuni ukukhuluma ngalo kwazise bakholwa wukuthi kuzokwenza inkukhu igcine ingasabanjwanga ekubeni amanzi okuyichutha esebila, nomumese wokuyinquma usuloliwe, namathe eseconsa.
AmaZulu FC kawamasha ekuthengeni njengoba egijime ngelungelo leDynamos kaPat Malabela maphakathi neminyaka yezi2000, aphinda azama ukuthenga iMpumalanga Black Aces ngesikhathi egencwa yizembe ngesizini yezi-2014/2015 kodwa kawaze aphumelela njengoba esezama iThanda manje.
UDelvaux utshele abezindaba ngesikhathi iThanda igcotshwa njengezingqwele zeNFD ukuthi uzoyidayisa uma engabatholi abaxhasi ezeseka ngokuthi iphakethe libhobokile ngokuba sebholeni. UDelvaux ugcine engabuyelanga kuleli phephandaba ngomyalezo athunyelelwe wona ngalolu daba kanjalo noLunga Sokhela oyisikhulu esiphezulu soSuthu okuthiwa yibona abasingethe izingxoxo.