IGQEMEKE UDUME LWENGOZI I-BAROKA
IGQEMEKE engeqiwa ntwala iBaroka FC ethola ikhadi elibomvu uLetladi Madubanya ongumdlali wayo omqoka ngaphambi kokuqala kwemidlalo yokuhlunga elwela ukuyinqoba ukuhlenga indawo yayo kwiAbsa Premiership.
Le kilabhu ishoveleke ngaphandle kwalesi sigaba iqeda endaweni ye-15 kwathi iHighlands Park yadliwa yizembe ukuyodlala kwiNational First Division (NFD) ngesizini ezayo.
IBaroka isethubeni lokubuyela phezulu uma ikwazile ukunqoba imidlalo yokuhlunga ezoyigijima neStellenbosch FC neBlack Leopards.
Umdlalo wokuqala wokuhlunga uzokuba ngoLwesithathu ngo-15h00 eCape Town lapho iStellenbosch izokwamukela khona iBaroka esindiswe ezembeni wukunqoba i-Ajax Cape Town ngo-1-0 wegoli likaMadubanya kowokugcina weligi.
IBaroka inqume ukungabuyeli eLimpopo emuva kwalo mdlalo ne-Ajax ukulungiselela umdlalo neStellenbosch.
UMilton Dlamini ongomunye wabaqeqeshi beBaroka, utshele leli phephandaba ukuthi kubalimazile ukuya kulo mdlalo ngaphandle kukaMadubanya obatakule kunzima bebhekene ne-Ajax.
Uthole ikhadi elibomvu kulo mdlalo. Lokhu kwenze iBaroka yalanda uJacky Moshekwa ukuvala isikhala sikaMadubanya.
Uthi unethemba lokuthi ezakhe zizobuyela zigijima esigabeni esikhulu kwazise uphethe abadlali abanesipiliyoni.
“Okuhle wukuthi ngiyazi kahle iStellenbosch neLeopards kwazise bengiqeqesha iMbombela United (edlala kwiNFD) ngaphambi kokujoyina iBaroka. Abadlali bethu ngeke baxakeke nakancane ukubhekana namakilabhu kaNFD. Bazi kahle ukuthi ikusasa labo esigabeni esikhulu lisezandleni zabo,” kusho uDlamini.
Kulindeleke ukuba iBaroka iqaphe ngeso lokhozi uMame Niang ongumgadli ovuthayo weStellenbosch FC. UNiang ugqame kakhulu esagijima kwiMoroka Swallows esingumlando ebholeni elikhokhelayo.