Imali ihlukanise izikhulu zeChiefs
Kuthiwa uKomphela angasindiswa yiyona ezembeni
IMALI kuthiwa ihlukanise phakathi izikhulu zeKaizer Chiefs ngodaba lukaSteve “Mphathi” Komphela ongumqeqeshi wale kilabhu okumele akhokhelwe izizumbulu uma echithwa njengoba esanenkontileka.
IChiefs iyivale kahle isizini iguqisa iBidvest Wits ngo-1-0 koweAbsa Premiership ngoMgqibelo ntambama eFNB Stadium, eSoweto. Igoli enqobe ngalo libhajiswe ezintanjeni nguGustavo Paez. Nakuba iChiefs iwunqobile lo mdlalo kodwa iqiniso elimile nje ngelokuthi iqede isizini inganqobanga nkomishi.
Lokho kusho ukuthi sekuyisizini yesibili le ephelayo le kilabhu inganqobi lutho ngaphansi kobuholi bukaKomphela.
Nokho maduzane kulindeleke kuphele ukuqagela ngekusasa lalo mqeqeshi njengoba iChiefs izokuba nomhlangano wokubheka okwenzeke ngale sizini bese inquma. Phakathi kwezinqumo ezibhekiwe ngesekusasa lomqeqeshi nabadlali abazodedelwa nabazothengwa. Nokho leli phephandaba lithole ngemithombo yalo ukuthi amalungu ebhodi leChiefs ahlukene phakathi ngodaba lukaKomphela.
Kuthiwa kukhona afuna axoshwe kuzokuba khona athi makagcinwe kuze kuphele inkontileka yakhe ngesizini ezayo.
“Into eyenza izikhulu zihlukane phakathi wukuthi uma uKomphela exoshwa iChiefs izohlukana nenkulu imali ekubeni kuzomele isayinise umqeqeshi omusha naye okuzodinga imkhokhele enkulu imali.
"Imali iyaziswa lapha kwiChiefs, ibhizinisi kuhlale kuqikelelwa ukuthi lenza inzuzo kalilahlekelwa yimali. Kodwa-ke umhlangano wamalungu ebhodi uzokuba khona maduzane okuyilapho kuzocaca khona ukuthi kuzokwenzakalani,” kusho lo mthombo.
UBobby Motaung oyiMenenjajikelele yeChiefs, uthi akukho azokusho okwamanje kuze kube bayahlangana babheke okwenzeke ngale sizini. IChiefs idumile ngokugodola nemali njengoba isiphenduke ithofi leMamelodi Sundo- wns ne-Orlando Pirates abahlwitha kalula abadlali abasuke befunwa yiziMpofana. Ike yaphenduka inhlekisa ngokuthenga kakhulu abadlali baseZimbabwe.
Bekuthiwa ikholelwa kubona ngoba beshibhile, ithola ababili ngentengo yoyedwa.
Ngakolunye uhlangothi, uKomphela uyabalisa ngokwenzeke ngale sizini.
“Emidlalweni eyisi-8 esiyidlalile siphisane ngamaphuzu ali-18 ngendlela engafanele sazenzela thina phansi. Kula maphuzu esinawo uma uwahlanganisa nalawa ali-18 esiphisane ngawo budlabha ngabe kukhulunywa enye into. Kodwa-ke ukubalisa kakusizi kufanele sibhekise amakhanda phezulu sibheke isizini ezayo,” kusho uKomphela.