Izokhiwa ngamafosholo imali emidlalweni kaSpencer
Nomphakathi wakwaNongoma uzozitika ngemidlalo yabe-PSL
INYUKILE imiklomelo kwizingqwele zeDerrick Spencer Soccer Festival ezokuba mhla zili-17 kuNhlangulana (June) eShowe High School.
Izingqwele zizogixabezwa ngoR50 000, inkomishi nejezi kuthi abahlulwe kowamanqamu bahlomule ngo-R20 000, inkomishi nejezi.
Lo mqhudelwano ogubha iminyaka eyisi-9 wasungulwa, uhlelwa yiDerrick Spencer Foundation eholwa nguSpencer odlalele amakilabhu amaningi kuleli kubalwa iKaizer Chiefs, iMamelodi Sundowns neBidvest Wits ukubala nje ambalwa.
USpencer unxusa abazali ukufika nezingane njengoba kuzokuba nendawo ekhethekile yokujabulisa izingane. Uqinisekise ukuthi ezokuphepha zizokube ziqine kakhulu. USpencer uthi uqoke ukufaka uhlelo lwezingane ukuze zizojabula njengoba zibhekene nokuntshontshwa nokubulawa.
Ngaphezu kwalokhu, uthi ufuna zijwayele ukubuka ibhola ukuze zingene kulona bese kwanda aba- ntu abazohamba ezinyathelweni zakhe eShowe.
Ubonge kakhulu abaxhasi okubalwa kubona iKing Cetshwayo District, uMasipala waseMlalazi, umNyango WezeMidlalo nabakwaABI.
Ngaphambi kwemidlalo kaSpe- ncer, umphakathi uzozitika ngeNongoma Professional Players Soccer Tournament ezokuba mhla zili-10 kuNhlangulana eLindizwe Sports Ground KwaNongoma. Lo mqhudelwano okuzodlala kuwona amakilabhu ali-16, uhlelwa ngabadlali baKwaNongoma abagijima kwiPremier Soccer League (PSL). Kubona kubalwa uThobani Mncwango wePolokwane City, uGoodman “Deco” Dlamini
weFree State Stars noNdabenhle Mthembu weRoyal Eagles. Lapha kuzokube kubangwa u-R20 000.