Babongwe ngezinkontileka bevika izembe kwiPSL
Icazelane amaphuzu iStellenbosch neBaroka
IFREE State Stars evike izembe sekuvalwe amehlo ngosuku lokugcina lokusonga iligi inqume ukugixabeza ngezinkontileka ezintsha abadlali abayitakulile yabe isikhomba indlela abangazange bayisize ngalutho.
ILANGA lithole ngemithombo yalo engashayi eceleni ukuthi iStars isinqume ukunika izinkontileka ezintsha uRooi Mahamutsa noThamsanqa Teyise abadlala emuva kule kilabhu ephethwe nguMike Mokoena.
Laba badlali basayine kwiStars maphakathi nesizini izinkontileka ezimfushane bengenayo imisebenzi, bexoshwe ngamakilabhu abo. UMahamutsa ubechithwe yi-Orlando Pirates, uTeyise ekhululwe yiSuperSport United.
Laba badlali babambe elikhulu iqhaza ekutheni iStars isinde ezembeni eligcine ligawule iHighlands Park kwathi iBaroka FC eqede endaweni ye-15 kwi- log yashoveleka emidlalweni yokuhlunga ukuyolwela ukubuyela kulesi sigaba esikhulu.
Kule midlalo yokuhlunga izo- bhekana neBlack Leopards neStellenbosch FC abaqede isizini endaweni yesibili nakweyesithathu ngokwahlukana kwiNational First Division (NFD). Izindaba zokululwa kwezinkontileka zalaba badlali ziqinisekiswe nguRansie Mokoena oyiMenenja-jikelele yeStars.
“Noma kanjani ngizobagcina ngesizini ezayo uMahamutsa noTeyise, sengibanikile izinkontileka ezintsha sekusele kubona ukuba bazisayine nje kuphela. Basisize kakhulu ngakho-ke siyabadinga njengoba silungiselela isizini ezayo, kasifuni ukuphinda sivike izembe,” kusho uRansie.
Uveze nokuthi badedela uDavies Nkausu, uThabang Matuka, u-Angelo Kerspuy, uNyiko Tshabangu noCharles Kampi. Uthi useqalile ukusayinisa abadlali abasha kodwa akazukubadalula njengamanje. Uthi ngesonto elizayo uzokube eseqedile ukusayinisa bonke abadlali abadingayo. Leli phephandaba limbuza ngemibiko ethi le kilabhu iyadayiswa uRansie, uthe:
“Ngeke siyidayise le kilabhu ngabe sibukela phansi abalandeli bethu abasiseke kunzima.”
* IStellenbosch FC ibuye kunzima ishaya kabili amagoli okulinganisa icazelana amaphuzu neBaroka FC kuba ngu-2-2 kowokuhlungela ukunyukela kwi-Absa Premiership izolo ngoLwesithathu ntambama e-Athlone Stadium, eCape Town.
Amagoli eBaroka ehambe phambili kabili ahlohlwe nguMxolisi Kunene ngomzuzu wama-39 noNkosinathi Ndlovu ngowama-54 kwathi awosokhaya abhakuziswa nguJarood Maroole ngowama-44 noDavid Booysen ngowama-65.
IStellenbosch izolibangisa eLimpopo ukuyobhekana neBlack Leopards emdlalweni wesibili wokuhlunga ozokuba ngoMgqibelo ngo-15h00 eThohoyandou Stadium.
Ikilabhu ezogcina idle ubhedu kule midlalo izonyukela kwiPremiership kuthi akhale ngaphansi agijime kwiNational First Division (NFD) ngesizini ezayo.