INKAKHA IZETHWESA IJOKA ELINZIMA KWI-PIRATES
USEKUBEKE emahlombe akhe ukukhuthaza abadlali be-Orlando Pirates u-Edward “Magents” Motale obegqoke ibhande lobukaputeni iqukula indebe yeCaf Champions League ngokuhlula i-Asec Mimosa yase-Ivory Coast ngowe-1995.
UMagents uzwakalise okukhulu ukukhathazeka ngesimo sePirates eshaye into ephansi kule sizini egubha iminyaka engama-80 yasungulwa. Ingene ehlazweni italajwa yiSuperSport United ngo-6-1 kanjalo neMamelodi Sundowns eyigaxe u-6-0 kweye-Absa Premiership ngokwahlukana. Le kilabhu iphinde yafaka usawoti enxebeni kubalandeli bayo ihluleka ukungena kwi- top 8.
Nokho isethubeni lokubageza izinhliziyo njengoba izobhekana neSuperSport United kowamanqamu weNedbank Cup ozokuba ngoMgqibelo womhla wama-24 kwephezulu eMoses Mabhida Stadium, eThekwini.
UMagents uthe: “Ngiyaxhumana nabadlali bePirates ukubagqugquzela ngibakhumbuze nobumqoka bokugqoka ijezi lale kilabhu ikakhulukazi u-Oupa Manyisa ongukaputeni. Abadlali bangiqinisekisile ukuthi bazokwenza konke okusemandleni ukunqoba iNedbank.
“Nakubona kakusemnandi ukuba yinhlekisa ezindaweni ezahlukene ngenxa yokungenzi kahle ensimini. Bafuna ukubuyisa isithunzi sekilabhu.”
Uqhube ngokuzwakalisa ukumethemba uKjell Jonevret ongumqeqeshi wePirates. Uthi umthandiswa wukuthi udlalisa ibhola elifuna amagoli hhayi ukupaka ibhasi.
“IPirates ilinyazwe kakhulu wukuba nabaqeqeshi abehlukene kule sizini ezosongwa. Nginethemba lokuthi izomgcina uJonevret ukuze umgqigqo asewuqalile uzoqhubeka kahle nangesizini ezayo,” kusho uMagents.
Le nkakha ibikhuluma neLANGA ngesikhathi kugqugquzelwa umphakathi waKwaMashu namaphethelo ukuvotela abadlali abazobamba iqhaza kwiCarling Black Label Champions Cup ezogijinywa yiPirates neKaizer Chiefs ngoMgqibelo womhla wama-29 kuNtulikazi (July) eFNB Stadium, eGoli.
Izindaba ezinhle kubathandi bala makilabhu ngezokuthi kuvotwa mahhala kulo nyaka. Amavoti asengenile abalelwa ku-2,5 million.
UMthunzi Jonas oyiMarketing Manager yeCarling Black Label kuleli, uthi ukungena kwamavoti ngalolu hlobo kwenza bangananazi ukuthi lo mqhudelwano nangalo nyaka uzokuba ngenkulu impumelelo. Uthi kuningi abazolokhu bekuthuthukisa kulo mqhudelwano.