IGagasi FM lilandela abalaleli balo
LIZIIMISELE ngokwenza umehluko emphakathini nokwazi kangcono abalaleli balo ithimba elisakaza uhlelo lwasekuseni i-I Love Mornings esiteshini somsakazo iGagasi FM.
UMzokoloko, uNonjab’s noHeazy banomkhankaso wokuvakashela amalokishi ngenhloso yokuyozwa kubalandeli bohlelo ukuthi yini abayithandayo ngohlelo lwabo nokuthi bangafisa kushintshe kuphi.
NgoLwesihlanu leli thimba belivakashele eMbali, eMgungundlovu. Kabagcini ngokuxoxa nabalaleli kodwa bavakashela nezikole ngenhloso yokuyonikela baphinde ba-gqugquzele abafundi.
“Sike sicele abantu kube yibo abasimemayo ngasemakubo. Uma sithatha isicelo siphinde sibheke nokuthi yindawo enezikole ezisesimeni esinjani,” kuchaza uMzokoloko.
Uthi emini uma bevakashele izikole kabagcini ngokunikela kodwa basuke beyokwethula nezinkulumo ezakhayo.
“Kubalulekile ukuba bazi ukuthi njengoba sesikuleli zinga esikulo nathi besinazo izingqinamba. Sibatshela ukuthi kakumele bavumele imuva labo kube yilo eliqagula ngekusasa labo,” kuqhuba uMzo.
Ukuze kube nenjabulo nokuthakasa kwabantu ezindaweni abasuke bezivakashele babuye bakhethe noma ngabe iyiphi i-taxi bese bekhokhela bonke abagibeli abasuke bekuyo.
NgoLwesihlanu baqhubeke baya eSpryt Lounge khona eMgungundlovu beyonethezeka nabalaleli. Bangaphezu kuka-600 abantu abebekhona kanti bekukhona nabaculi abehlukene.
“Kasigcinile la sisazoqhubeka nokuvakashela amanye amaloki- shi. Abalaleli sicela baqhubeke nokusimema , thina sizodonswa wubuningi bezicelo,” kuphetha uMzokoloko.
Kubalulekile ukuba bazi ukuthi njengoba sesikuleli zinga esikulo nathi besinazo izingqinamba. Sibatshela ukuthi kakumele bavumele ...