Kuxabene ubendle kuKhongolose
Bakhala ngokukhonjwa ngezibhamu
KUXABENE ubendle, ijamelene ngaphakathi kwi-African National Congress (ANC) eFar North Region eMkhanyakude, enyakatho-mpumalanga yeKwaZulu-Natal, njengoba abaholi bayo bafakane enkantolo.
Sekukaningi imithombo yeLANGA ilihlebela ukuthi kudungeka imihlangano yaleli qembu, kukhishelwane izibhamu, kusongelwane kwesinye isikhathi kudonswane ngezihluthu nothayi. Kubikwa ukuthi okuningi kwalokhu kwenzeka ehhovisi le-ANC eliseMkhuze lapho kugcinwa yonke iminingwane ebalulekile yaleli qembu.
Umbango nokuklwebhana kwabaholi kuthiwa sekukapakele komasipala ababili abangaphansi kowesifunda uMkhanyakude, okungowaseJozini nowaKwaMhlabuyalingana.
Amakhansela aleli qembu kuthiwa achaphana bume ngenhlamba, kudungeke imihlangano yamakhokhasi. ILANGA lihabule ukuthi izinkinga eziningi zidalwa wukuthi kunabathile abantshontsha ubulunga bamanye amalunga ngokuklebhula amaphepha emabhukwini maqede kufakwe abantu abangaziwa.
Kubikwa ukuthi umbango omkhulu uphakathi kukaMnu Bethuel Ndodephethe Mthethwa ongusihlalo waleli qembu, osemkhankasweni wokuvikela isihlalo sakhe ukuba singaweli ezandleni zikaMnu Nkosingiphile Mlambo ongunobhala walo.
Sekuwumlando ukuthi uMnu Mlambo noMnu Mthethwa bebehleka ndawonye kuze kuvele elomhlathi ngesikhathi behlula ikhempu kaMnu Solomon Mkhombo obesemjahweni wesikhundla sokuba ngusihlalo we-ANC eFar North Region phambilini. Leli phephandaba lithole ukuthi izinkinga ezi- ningi zidalwa wukusondela kwezinsuku zengqungquthela yokukhetha ubuholi okumele ibe ngoNtulikazi (July) nonyaka.
Isigameko sakamuva esishiye abantu bekhexe imilomo, kube ngesokuboshwa kukaMnu Mbongeleni Gina oyisekela likanobhala we-ANC kulesi siyingi.
UMnu Gina ubengusomlomo kaMasipala waseMtubatuba phambilini kanti manje useyikhansela eli- sesigungwini esiphezulu kulo masipala, abuye amele i-ANC eMkhanyakude.
Uboshwe ngoLwesibili ngezinsolo zokweba amabhuku obulunga okubikwa ukuthi uwathathe ngenkani kowesifazane ohlala ehhovisini lakhe noMnu Mlambo.
Kubikwa ukuthi uMnu Gina ushaqwe ngamaphoyisa aseMkhuze esemzini wakhe eMtubatuba. Izolo ubevele eNkantolo yeMa- ntshi yasoBonjeni eyofaka isicelo sebheyili. Kwesinye isigameko kuvulwe icala lokushaywa nokwesatshiswa esiteshini samaphoyisa aseJozini, okubikwa ukuthi livulwe ngelinye lamakhansela angabhemi eshungwini elilodwa noMnu Mthethwa.
Kuvulwa leli cala nje, kube nesigameko esenzeke emahhovisi kamasipala (waseJozini) lapho amalunga be-ANC enikele kuwona eyovala amakhansela aleli qembu ukuba angavumelani nokuba kuphasiswe isabelomali salo nyaka.
Kuthiwa leli khansela elivule icala lithe lona liyaqhubeka nokungena kulowo mhlangano ngoba kuzobambezeleka intuthuko.
Amalunga akhala ngokusatshiswa ngezibhamu okuthiwa kwenziwa ngonogada bezikhulu.
“Kulapho lo mhlonishwa ethole amachaphazelo wadatshulwa ngempama nequpha emaphaseji kamasipala. Isimo sishubile lapha eqenjini lethu, mina ngithe ngiyafika ehhovisi eMkhuze ngathola ukuthi kangikho ohlwini lwabantu abangamalunga eqembu ajoyinile ngokusemthethweni.
"Kakukwazi ukuba ngingahlala ngingatholakali ekubeni ngivuselele ubulunga ngoMasingana (January). Ngithe uma ngibuyela ngiyofuna incazelo ngalokhu, impendu- lo kube wumbhobho wesibhamu engikhonjwe ngawo ngunogada womunye umholi.
"Kumanje ngihlela ukuba ngiyomvulela icala lo nogada. Selokhu kwathi nhlo ngiyi-ANC, kakukwazi ukuthi kuzoqhamuka ingane isingitshela ukuthi kangilona ilunga layo,” kubhoka leli lunga le-ANC.
Ethintwa ngalezi zinkinga uMnu Mthethwa - ongusihlalo we-ANC eFar North - ukuqinisekisile ukuboshwa kukaMnu Gina wasola imbangi yakhe, uMnu Mlambo.
Utshele leli phephandaba ukuthi ukuboshwa kukaMnu Gina kuyimizamo yokuphazamisa izinhlelo zengqungquthela yokuqoka ubuholi.
“Kakulona iqiniso ukuthi uGina uwantshontshile amabhuku kodwa sibe nomhlangano wokudingida lolu daba okuyilapho siphume nesinqumo sokuba abuyele kubanikazi bawo emagatsheni ngoba sibona ubuningi bezikhalo zabantu bethi bayakhishwa ohlwini lwamalunga kufakwe abangaziwa.
"Abanye basibikela ukuthi bayesatshiswa bathi kuthiwa kabavunyelwe ukuzibheka emabhukwini.
"Sikwenze lokhu ngenhloso yokuzama ukudala ukuthula eqenjini ukuze sizoba nengqungquthela enokuthula. Kuyiqiniso ukuthi amabhuku akhishiwe amanye amakhasi kwafakwa abantu abangaziwa,” kusho uMnu Mthethwa.
Ethintwa ngezinsolo ezibhekiswe kuyena uMnu Mlambo, uthe akulona iqiniso ukuthi ubeqonde ukulaya uzakwabo kodwa yena uvule icala lokugqekezwa kwehhovisi okufanele aliqaphele.
Uthe wuphenyo lwamaphoyisa oluholele ekuboshweni kwalo mholi.
“Kuntshontshwe amabhuku angama-70 nama- laptop. Okunye okufanele izwe likwazi wukuthi mina kakukho nesisodwa isikhundla engisigaqele eqenjini futhi kakukho lapho sike sahlala phansi sabhunga ngendlela okufanele kwabiwe ngayo izikhundla.
"Namanje ngimile kwelokuthi ngeke ngithule ekubeni konakala izinto ehhovisi. Kakulona iqiniso ukuthi kunabantu osekukhishwe amagama abo ohlwini lobulunga beqembu.
"Ukuntshontshwa kwamabhuku kuzoholela ekubeni ingahlali ingqungquthela yokuqoka ubuholi,” kusho uMnu Mlambo.
Okhulumela amaphoyisa KwaZulu-Natal, uCapt Nqobile Gwala, usiqinisekisile isigameko sokugqekezwa kwehhovisi le-ANC.
“Ummangali uvule icala lokugqekezwa kwehhovisi, uthole ucingo oluvela kumuntu thizeni othe ufuna ukungena ehhovisi. Uthe uma efika wathola ukuthi ligqekeziwe. Leli cala liphenywa ngamaphoyisa aseMkhuze,” kusho uCapt Gwala.