VUKA UZITHINTITHE
KUNAMAQINISO okuthi ukuba sasitsheliwe wona sasingeke sadelela futhi sasingeke sabaphakamela abanye abantu.
Kubuhlungu ukwazi ukuthi izinto esiyizona nesinazo ziqala ngezinyembezi futhi ziphele ngezinyembezi. Imoto kanokusho le onayo, mhlazane kuphela ngayo kuyoba yizinyembezi zodwa.
Umshado okuwona wawuqala ngezinyembezi zenjabulo kodwa uma sekuya ngasekupheleni kuba yizinyembezi zobuhlungu. Kungaba yisehlukaniso noma nje kube wukuthi kushone oyedwa phakathi kwenu kodwa nje iqiniso elimile lithi le nto iqala kamnandi kodwa futhi singalibalekeli elokuthi uma isiphela iphela kabuhlungu.
Kumnandi ukuba muhle, ubukeke abantu baze bakuncome kodwa nabo lobo buhle uma sebuphela, buphela ngezinyembezi. Uyozwa umuntu owayemuhle ethi: “Yeka ngezikhathi zami!” Elinye nje lamaqiniso esingalitshelwanga noma salitshelwa kodwa sangalinaka, ngelokuthi yonke into oyenzayo uyatshala futhi uyovuna kusasa.
Abantu abadala bavame ukuthi konke okwenzayo uzenzela wena. Uxoshisa abantu emsebenzini bengenzelutho nje, yazi ukuthi kusasa uzovuna. Ngikhuluma nje kunomuntu odonsayo ejele engenze lutho, uboshwa nje umuntu wabantu uqanjelwe amanga ngumuntu thizeni. Uma uqambela abantu amanga, uze wazi ukuthi nakhona lapho uyatshala, uyovuna ngelinye ilanga. Singakuxaki isivuno mhla sifika kuwena ngelinye ilanga. Lapha empilweni amaqiniso esingatshelwanga wona asibulele. Zimbalwa izinto oyozivuna la emhlabeni kanti kawuzitshalanga futhi yonke into oyitshalayo iyomila ngesikhathi ongasicabanganga.
Lapha emhlabeni sifana nomama abaphethe amageja beya emasimini. Bayazi-ke omama ukuthi ngeke watshala ummbila bese uvuna ubhontshisi kodwa umuntu uvuna lokho akutshalile. Nathi singabantu siyatshala ngolimi lwethu futhi siyatshala nangezenzo zethu.
Ofundayo makaqaphele kanti nozwayo makezwe. Ungayenzi empilweni yomunye umuntu into ongeke wathanda ukuyibona yenziwa ngomunye umuntu kuwena. Yonke into oyenzayo, kungaba ngenhle noma embi, iyobuya kuwena ngelinye ilanga isiphindaphindiwe. Singakhohlwa wukuthi utshala uhlamvu olulodwa lommbila enhlabathini kodwa uma usuvuna uvuna isikhwebu sommbila.
Nansi-ke into enhle nembi ngesivuno empilweni: izinto eziningi esizenzayo empilweni ziwela ezinganeni zethu. Ngeke sakubalekela ukuthi kunezingane eziphila kamnandi ngenxa yezinto ezinhle ezenziwa ngabazali bazo futhi singeke sakuziba ukuthi kunezingane zethu okwama impilo kuzona ngenxa yamaphutha ethu singabazali ngoba ngesinye isikhathi iBhayibheli liyasho ukuthi isibusiso noma isiqalekiso sabazali siyehlela emadodaneni abazali.
Ake ngikhulumise okomuntu nje: ngiqaphelile njalo ukuthi kunobaba owashaya inkosikazi yakhe wayilimaza phambi kwezingane zakhe. Namhlanje izingane zalowo baba zihlukumeza zibulala abantu besifazane, okuyinkinga enkulu esibhekene nayo ezweni lakithi kumanje. Kangithandi-ke futhi kangifuni ukuyiphatha le yomuntu wesifazane noma ekamama othi uma exabene nomakhelwane bese ethuma izingane ukuthi ziyomlwela naye. Namhlanje lezo zingane kazinanembeza wokulwa nonina nanoma ngubani nje empilweni ozicasulile.
Kayikho into oyoyitshala ungayivuni. Wukuthi nje ngesinye isikhathi kakuvuni wena kodwa kuvuna izingane zakho.
UNkulunkulu makasisize kuyinyanga yentsha ukuthi sikwazi ukuhlala nezingane zethu noma singazizali ezinye - thina singamaAfrika nezingane zikamakhelwane ngezethu - masizitshele amaphutha esiwenzile empilweni ukuthi bekungafanele siwenze. Umzali wangempela ngovumayo ukuthi ube yisambulela, amathonsi ashaye yena angazishayi izingane zakhe. Ngiyafisa uma isikhathi sivuma kuseyinyanga yentsha sikhulume nayo ukuthi empilweni ngeke wabusiseka uma abazali bakho noma nje abantu abadala ophila nabo bengakufiselanga ukuthi ubusiseke. Noma nje mangithi uma bengakaze bakubusise, ngeke ubusiswe. Isibusiso kasizi ngabangani bakho kodwa uyosithola ngabantu abadala kunawe.
Empilweni sivuna esikutshalile. Masiqaphele ukuthi senzani, sibaphatha kanjani abanye abantu. Yonke into esiyenzayo iyobuya ize kithina, yehlele nakubantwana bethu. Ake ngiphinde ngithi yonke into iqala ngezinyembezi bese iphetha ngezinyembezi. * Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10. Siku110 Williams Road uma usuzofika eDalbridge Train Station. * Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya umqhafazo, siyakubeka nasemkhulekweni. *UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034