ZIZOWUVEZA UMAYIHLONZE IZIBALO ZAKAMUVA
SIMNANDI isiZulu ngoba siyakwazi ukuyibeka into icace bha njengempahla yesele zikhathi zonke.
Kusuke kuthiwani kanti uma kuthiwa abantu kabayi nganxanye bengemanzi?
Cishe nsuku zonke ezinkundleni ezahlukene ikakhulukazi kwisocial media enanamakhasi agxila kweziphathelene nomsakazo, kukhalwa ngezinga eliphansi kubasakazi banamuhla.
Esikhathini esiningi basolwa ngokuqhakambisa ukuba ngosaziwayo esikhundleni sokushaya umsebenzi, bagxile kuma- basic. Bagxila kakhulu ekuzidayiseni ngoba bathi bangama- brand nokusho ukuthi ungabafanisa nje nemikhiqizo ejwayelekile edayisayo nedinga ukukhangiswa.
Izibalo zakamuva zabalalela umsakazo zikhombisa okwehlukile kulo muzwa abanye abanawo. Phansi kwalezi zimo, ungalindela ukuthi imisakazo kayisalalelwa nhlobo kodwa izibalo zakamuva zikhombisa ukuthi senyukile isibalo sabalaleli emisakazweni eminingi.
Nginelikhulu ithemba lokuthi kusazoshintsha futhi lokhu njengoba lolu cwaningo belwenziwe ngonyaka odlule.
Siyakuqonda ukuthi umthelela omkhulu wokwenzeke ngasekuqaleni konyaka uzocaca uma sekukhishwa izibalo zocwaningo olwenzeke emuva kuka-April.
Izibalo eziphumile zeBroadcast Research Council of SA zikhombise ukukhula kanti sesizolinda ezeSouth African Advertising Research Foundation (SAARF) eziphuma njalo ngekota yonyaka. Yizo phela lezi zibalo ezisetshenziswa nangabathengi bezikhangiso ngoba bafuna nabo ukuya la kunabalaleli abaningi khona.
Kusazoba nenkulu inkinga emisakazweni etholakala kwi-internet ngoba nayo iyayifuna le mali yezikhangiso kanti kakukabi lula ukuba itholakale kuwonke wonke ngenxa yale data emba eqolo.
Abasakazi abebesebenzela iSABC phambilini okunguGareth Cliff, Thabo “Tbo Touch” Molefe noSbusiso “DJ Sbu” Leope bangayibhincisela nxanye ngempela iSABC uma ingaba khona indlela yokuba lezi ziteshi zabo zitholakale kalula.
Kangingabazi ukuthi uma ingabakhona indlela yokulawula lezi ziteshi, nazo zingene ohlwini olujwayelekile lwendlela okwenziwa ngayo i- research kungasuka isidumo eziteshini ezijwayelekile.
Silindile nokubona ukuthi izinguquko zakamuva kwiGagasi FM eselinoDJ Naves noSphectacula, Vuma FM ne-East Coast Radio abathathe laba abebesebenza kwiGagasi FM uThandolwethu noTP zizoba namuphi umthelela.
Ngike ngazinika ithuba lokulalela uThandolwethu ngosuku lwakhe lokuqala, kangingabazi ukuthi uzongena khaxa kulo msakazo.
Ngizwe i- link yakhe yokuqala kuphela kanti nalaba abasha kwiGagasi FM sengibezwe kwaze kwaphela isonto, kuzwakala bezoyishukumisa.
Angazi kodwa noma yisinqumo sikamphathi wezinhlelo yini ukuba uNaves azwakale elandela ngemuva njengoba uSphectacula kunguye ozwakala ehola uhlelo. Angazi noma isizathu wukuthi ba- safuna ajwayele nesiZulu yini ngoba bengazi ukuthi bayalingana kodwa kakuzwakali kanjalo. Izibalo ezilandelayo zizowuveza umayihlonze.