UMKOKSTAD UZOKWETHULA ICWECWE
ISILOMO somculi wowokholo, uDumi Mkokstad ( osesithombeni), sizokwenza okwehlukile sethula i-album yaso yesi-8 sisemkhakheni womculo.
UMkokstad utshele ILANGA LeTheku ukuthi uzobe eqala ngqa ukwenza umcimbi wokwethulwa kwe-album yakhe kusukela aqala ukucula.
Uthi ukhethe ukwethula le album yakhe esihloko sithi “Egameni LikaJesu” ngokwenza umcimbi ohambisana nomkhuleko eThekwini Community Church, enkabeni yeTheku kusasa ngoLwesihlanu kusukela ngelesithupha kuze kuse.
“Kusukela ngaqala ukucula angikaze ngenze umcimbi wokwethula i-album ngakho ngibone ukuthi kule ngenze okwehlukile. Inhloso enkulu wukuba kube nomkhuleko lapho izokhulekelwa khona ngabalandeli bami nabefundisi bamabandla ahlukene,” kuchaza lo mculi oseke wahlabana ngenqwaba yezindondo.
Uthi kubalulekile ukuba njengoba becula umculo wowokholo baqhube phambili umkhuleko njengoba kunabantu abasebenzisa izingoma zabo ukuxhumana noMdali.
“Izingoma zethu ziwukudla komphefumulo kubantu abaningi njengoba zakha futhi ziduduza. Kuhle ukuba sibeke uNkulunkulu phambili kukho konke esikwenza- yo,” kusho lo mculi.
Uthi emcimbini wakusasa ngoLwesihlanu ubophele abaculi okubalwa kubo uBatusile, uHlengiwe Mhlaba, Thobekile, Thinah Zungu, Ayanda Ntanzi, Nathi noNkanyiso, Butho Vuthela nabanye abaningi. .
UMkokstad uphethe ngokunxusa abantu ukuba baphume ngobuningi njengoba kuzobe kungenwa ngokuthenga iCD emnyango. I-CD yakhe isiyatholakala ezitolo ezidayisa umculo.