Ijabhise osokhaya iThongathi FC
Iyiqale ngempumelelo eyokuhlungela i-NFD
IYIQALE ngegiya eliphezulu iThongathi FC eyithemba leKwaZulu-Natal imidlalo yeSouth African Football Association (Safa) ABC Motsepe League National Play-Offs iguqisa osokhaya i-Eastern Cape Bees ngo1-0 izolo ngoLwesithathu eBuffalo City Stadium, e-Eastern Cape.
Igoli enqobe ngalo iThongathi FC lingqofelwe enethini nguXolani S’lawula ngomzuzu wesihlanu.
Le midlalo yokulwela ukunyukela kwiNational First Division (NFD) izosongwa ngeSonto.
Uma iThongathi FC igcina ngokuyinqoba le midlalo izokuba yikilabhu yesine ukumela iKwaZulu-Natal kwiNFD ngemuva koSuthu, yiRo-yal Eagles neReal Kings.
UKwenzakwakhe Ngwenya omele iSafa esifundazweni, utshele ILANGA izolo ukuthi iyancomeka indlela eyiqale ngayo le midlalo iThongathi FC.
“Ngijabule kakhulu ngendlela abalidlala ngayo ibhola, bakhombisile ukuthi bazokuba yingozi enkulu uma bezobhekisa phansi amakhanda bangakhukhumali.
Ukuqala kahle kuyibeka ethubeni lokunyuka yize unzima umdlalo olandelayo neZizwe United yaseWestern Cape,” kusho uNgwenya.
Lo mdlalo uzokuba namuhla ngoLwesine.
Nyakenye iKwaZulu-Natal ibimelwe yiReal Kings United kule midlalo ebiseBloemfontein. Kumanje iKings idlala kwiNFD.
IThongathi FC kumele igade uMpho “Song” Erasmus noSiyabonga Nontshinga abangafuniseli ngegoli.
U-Erasmus ushaye amagoli ali19 kwiligi yaseWestern Cape kanti nayizolo ushaye amane.
Le kilabhu icijwa nguJulius “JD” Dube oke waqeqesha iChippa United.
Imiphumela yayizolo ngoLwesithathu imi kanje: EC Bees 0, Thongathi FC 1; Zizwe United 5, Mainstay United 0; Maccabi 1, Super Eagles 2; The Dolphins 0, Acornbush United 3.
Imidlalo ezokuba namuhla ngoLwesine imi kanje:
EJan Smuts: EC Bees vs Mainstay United 09h00, Zizwe United vs Thongathi FC 11h00, Acornbush United vs Buya Msuthu 13h00, The Dolphins vs Super Eagles 15h00. KUSASA NGOLWESIHLANU EJan Smuts: The Dolphins vs Gauteng Champions 12h30, Thongathi FC vs Mainstay United 15h00.
ESisa Dukashe: Super Eagles vs Buya Msuthu 12h30, Zizwe United vs EC Bees 15h00.