UVALO EZISEBENZINI ZIKAMASIPALA OSUYISIGODI SOKUFA
SEKUQUBULE itwetwe ezisebenzini nasemakhanseleni ukufa kwabantu ngapha nangapha kuMasipala waseMzimkhulu, eningizimu yeKwaZulu-Natal.
Isehlakalo sakamuva esixegisa amadolo ezisebenzini nasemakhanseleni, okumanje ayinqikaza ukuya emsebenzini ngoba esaba ukuthi angase alandele ozakwabo, ngesokushona kukaNkz Florence “Mama Flo” Nene ( osesithombeni) okubikwa ukuthi imoto yakhe iphaphalaze yaphuma emgwaqweni ngaseRichmond, maphakathi neKwaZuluNatal ngeledlule ephuma emhlanganweni weqembu lakhe, i-African National Congress (ANC).
UNkz Nene ushona nje, sekushone amakhansela amabili aseMzimkhulu - nomunye obengaselona ikhansela - selokhu kuqale umbango oshisa phansi ngengqungquthela obekulindeleke ukuba ngale nyanga nokho yahlehliswa ngenxa yezihibe ezihambisana nokukhala kwenganono.
Lolu khondolo luqale ngesikhathi kubulawa uMnu Khayalethu Thobela obengusomlomo kamasipala, odutshulwe wabulawa ngoNdasa (April) engena kwakhe eMfundweni, eMzimkhulu.
Emasontweni ambalwa kubulawe uMnu Thobela, kuhlaselwe uMnu Khayalethu Mgcwaba ehleli nomndeni wakhe kwakhe eMachunwini wadutshulwa wabulawa.
UNkz Nene ushona nje, kusanda kungcwatshwa uMnu Wiseman Shibase obeyikhansela naye obulawe eyongena kwakhe eGugwini.
Nakuba ukushona kukaNkz Nene kwehlukile kodwa amaphaphu aphezulu ezisebenzini zikamasipala nakosopolitiki, bathi kanti kukhale nyonini eMzimkhulu.
IMeya yaseMzimkhulu, uMnu Mphuthumi Mpabanga, ithi ididekile kodwa konke sebekubeke kophezulu.
“Kukubi kunjalo kodwa siyazama ukugqugquzela abantu ngomsebenzi ukuze kungami ukusebenza emkhandlwini ngoba empeleni izisebenzi zethu zizibona zingaphephile neze,” kusho uMnu Mpabanga.
Ithi kubuhlungu ngoba manje umasipala wayo usuphenduke kumbe usubizwa njengendawo yokufa nokuthi uma bephuma beya emsebenzini, imindeni yabo isala inovalo lokuthi bazobuya yini ntambama.
“Ngeke ngikuphike ukuthi imiqondo yabanye bethu kayisasebenzi ngendlela efanele ngenxa yokulokhu kukhulunywa ngokufa masonto onke kumasipala,” kusho uMnu Mpabanga.
USihlalo we-ANC esifundeni iHarry Gwala, uMnu Zamokwakhe Nxumalo, naye uzwakalise ukukhathazeka ngendaba yaseMzimkhulu.