UShenge usebenzise ukwethembeka kubavoti
EZEPOLITIKI: Uthi akazi angalala kanjani uma engenza inkohlakalo
UMENGAMELI weNkatha Freedom Party (IFP), iNkosi Mangosuthu Buthelezi, izolo ngeSonto usebenzise ukwethembeka kweqembu lakhe njengethuluzi lokuheha abantu basoPhongolo, enyakatho yeKwaZulu-Natal, ukuba balivotele okhethweni lokuchibiyela olungoLwesithathu kuwadi 7 kule ndawo.
INkosi Buthelezi ikwenze lokhu izolo ivakashele oPhongolo ukuyokhuluma nabantu bakhona ngalolu khetho obekufanele lube ngoNdasa (March) kodwa lwahlehliswa njengoba kube nezinsolo
zokuthi abantu ababhalisela ukuvota empeleni kakusibo bonke abahlala kule wadi.
Ikhuluma nabantu basoPhongolo iNkosi Buthelezi, kayithembisi izulu nomhlaba kodwa yethembisa ukuthi abantu bazobona ukwethembeka uma bengase bavotele i-IFP.
“Amanye amaqembu ezepolitiki njenge-African National Congress (ANC), asavumela ukubuswa yinkohlakalo.
"I-ANC ivumela abaholi abakhohlakele ukuba babesezikhundleni futhi ibavikele noma ngabe amahlazo abo asevele obala. Thina njengeNkatha sizoqhubeka nokuba yinhlangano ongayethe- mba futhi sithembeke.
"Kangazi ukuthi ngingalala kanjani nje ebusuku uma ngingase ngenze into ewukukhohlakala.
"Kangikholwa ukuthi bona ubuthongo bungake bufike ngibe ngazi kahle ukuthi ngehlulekile wukusebenzela izwe lami ngokwethembeka.
"Mina ngiyisithunywa sabantu, ngilapha nje yingoba ngizosebenzela nina. Uma ngingase ngichezuke kulokhu, kuyofanele ngiphendule,” kusho iNkosi Buthelezi.
Ithe kubaholi abaningi eNingizimu Afrika sekwaba yinto elula ukwehluleka wukusebenzela abantu ababathumile.
“Laba baholi basebenzisa izikhundla abafakwe kuzona ngabantu ukuze kuzuze bona, bakhohlwe ngabantu.
Kuba nzima ukuphuma uma ungumholi osungene kulesi sihibe.
"Kuthatha izwi labavoti elisuke lizothi sekwanele phuma bese kungena abantu abazosebenza ngokweqiniso.
"Ngakho ngiyanincenga bantu basoPhongolo, phumani ngobuningi benu niyovota ngoLwesithathu.
"Ukuvota kwenu yikhona okuzoba wumkhombandlela wekusasa lalo masipala, kuqinise nesifunda.
"Kuzophinde kuthumele umyalezo nakulabo abasafuna ukuqhubeka nokudlala ngani ukuthi senikhathele manje,” kusho inkosi.
Ibonge bonke abantu abavotele i-IFP okhethweni lohulumeni basekhaya obelungoNcwaba (August) nyakenye. Ithe imiphumela yalolu khetho iyakhombisa ukuthi kungekudala iKwaZulu-Natal izobuyela ezandleni ze-IFP.
Itshele abantu ukuthi abahlaziyi sebeqagulile ukuthi imiphumela ye-IFP izoba mihle kakhulu okhethweni lwangowezi-2019.
“Ukunqoba uMasipala waseNquthu bekuyisiqalo nje,” kubeka iNkosi Buthelezi.