I-ABSA IHLONGOZA UKUVALA UKAMADIBA
KUBUKEKA isemanzini abilayo inkosikazi kaMengameli Jacob Zuma, uNkk Thobeka Madiba-Zuma, okuvele emithonjeni yabezindaba izolo ngeSonto ukuthi isibhalelwe yibhange i-ABSA lifuna incazelo ngezizumbulu zemali ezikwi-akhawunti yayo.
Leli bhange lesabise UNkk Madiba-Zuma ngokuthi lizoyivala i-akhawunti yakhe uma kuqhubeka kungena izigidi kuyona kodwa engalichazeli ukuthi ziphumaphi.
Lokhu kwenzeka emuva konyaka leli bhange liqede ubudlelwano ebelinabo nendodana kaMengameli Zuma, uMnu Duduzani Zuma, njengoba livale i- cheque ne- transactional akhawunti yakhe.
Kuzokhumbuleka ukuthi emuva kokuvalwa kwe-akhawunti kaMnu Zuma, amabhange ngonyaka odlule avale wonke ama-akhawunti axhumene nezinkampani zomndeni wakwaGupta - okuwumndeni odlelana noMengameli Zuma futhi osematheni kulezi zinsuku ngenxa yezinsolo eziningi ezithinta i-United Arab Emirates (UAE).
Okwamanje kakucaci ukuthi lezi zizumbulu ezikwi-akhawuntini kaNkk Madiba- Zuma zihlangene yini nomndeni wakwaGupta.
Ephephandabeni lesiNgisi eliphuma ngeSonto, iSunday Times, uNkk Madiba-Zuma uthe kayikho incwadi ephuma kwa-Absa aseyi- tholile.
"Kanginalwazi mayelana nokuthi i-ABSA isonga ukuvala i-akhawunti yami. Kakukho leli bhange elikwenzile ukuxhumana nami ngalolu daba.
"Kangikaze ngithole ncwadi engazisa ngalokhu,” kusho uNkk Madiba-Zuma.
Umthombo ongaphakathi ebhange uthi uNkk Madiba-Zuma uthunyelelwe incwadi ekuqaleni konyaka.
“Lokhu yindlela esetshenziswa ngamabhange ukuze aqonde ukungena nokuphuma kwezimali kuma-akhawunti amakhasimende awo.
Omunye umthombo uthi: “Uma engachazi ngale mali, i-ABSA izo- phoqeleka ukudlulisela udaba lwakhe kwiFinancial Intelligence Centre, okuyiyona ezomphenya,” kusho lo mthombo.
UNkk Madiba-Zuma unesikhwama esiqanjwe ngaye esigxile ekusizeni amantombazane, sibhekane nokulwa nesandulela-ngculaza nokunye okuphathelene nezempilo. Kakucaci noma inhlangano yakhe engenzinzuzo yiyona yini le emfakela le mali engaka kwazise i-sizabulwembu (website) sayo kasisebenzi.
Kuphinde kuvele ukuthi unobunikazi enkampanini edayisa izindlu, iLavender Sky Investment, nezinye izinkampani ezimbili iCherry Moss Trade neInvest neGlenlyn Investments.