UBONGA AMANDLA ELANGA
UBONGA uyanconcoza ephephandabeni ILANGA owesifazane waseNanda, enyakatho yeTheku, ogcine ethole isitifiketi sokuzalwa sendodakazi yakhe emahhovisi oMnyango wezaseKhaya eMngeni, ngeledlule.
ILANGA like labika ngobunzima uNkk Lindiwe Mavundla (50) abebhekene nabo ngenxa yokungasitholi isitifiketi sokuzalwa sendodakazi yakhe, uNothando.
UNkk Mavundla utshele ILANGA ukuthi ngoNhlolanja (February) nyakenye uye kwandabazabantu eMngeni eyokwenzela kabusha indodakazi yakhe isitifiketi sokuzalwa - ngokwesitifiketi esidala ibibiza uZulu okuyisibongo sakhe (uNkk Mavundla) - ngoba efuna ukuba ibize isibongo sikayise njengoba ebeseshadile naye.
Kuzokhumbuleka ukuthi uNkk Mavundla utshelwe ngabehhovisi lalo mnyango ukuba ayokwe- nza ulibofuzo lwendodakazi yakhe ngoba kuvela ukuthi akayizali kodwa unina ngowesifazane waseHammanskraal, enyakatho yeGauteng onguTracy Nhlasi.
Uthi ubonga ILANGA ngokugcina ekwazile ukuthola isitifiketi sendodakazi yakhe njengoba besekuphele unyaka wonke elindile. Ucishe wamelwa yinhliziyo ngesikhathi bethi uNothando akazalwa nguyena.
Utshele ILANGA ukuthi ujabule ngokuthola isitifiketi sikaNothando ngoba ubeseqale ukulahla ithemba ngenxa yokuphela kwesikhathi eside singabuyi ePretoria.
Uthi ngaphandle kweLANGA indodakazi yakhe ibingeke izibhale izivivinyo zokuphela konyaka.
“Ngiswele amazwi okubonga ephephandabeni ILANGA ngoba ngaphandle kwalo ngabe kangilutholanga usizo. Ngiyafisa ukuba ILANGA liqhubeke nomsebenzi walo omuhle wokusiza abantu abaswele. Impilo yendodakazi yami izoba nenqubekela phambili manje njengoba isitifiketi sayo sesiphumile. Ibizoba nenkinga yokuthi yenze umazisi njengoba iminyaka isiyivumela ukuwenza. Inhliziyo yami igcwele injabulo,” kusho uNkk Mavundla.
Impilo yendodakazi yami isizoba nenqubekela phambili.