Ubulawelwe imali yesondlo sezingane
Isidumbu sitholwe ngaphansi kombhede sesiqala ukonakala
USABABAZA isihluku umphakathi waseMfekayi, eMtubatuba, ogwini olusenyakatho yeKwaZuluNatal, emuva kokutholakala kwesidumbu sowesifazane ngaphansi kombhede sisongwe ngengubo kanti kusolwa isoka lakhe ngalokhu.
UNkz Nkosingiphile Gumede (22), wakhona eMfekayi, kuthiwa uthathwe yisoka lakhe elinguMnu Zakhe Khumalo (34) ngoMgqibelo odlule baya kubo (kwesoka) - nalo ngelakhona eMtubatuba.
Kuthiwa uNkz Gumede ubulawa nje, bekunokungezwani kahle phakathi kwakhe noMnu Khumalo kubangwa ukuthi akazondli izingane zabo ezintathu.
Nokho kakwaziwa ukuthi indaba isuswe yini ngosuku abulawe ngalo - ngaphandle nje komdonsiswano wesondlo. Kuthiwa uMnu Khumalo uzivumele phambi komphakathi obugcwele emzini okutholakale kuwona isidumbu ngoLwesithathu olwedlule wathi uNkz Gumede umdlise umuthi wamagundane ngoba ecasukile.
Isidumbu sithathwe ngalo usuku lwesigameko sayohlonzwa njengoba kukhona nezinsolo zokuthi uNkz Gumede uklinyiwe.
Uyise kaNkz Gumede, uMnu Thomas Ngema, uthi kayikho ingxabano enkulu yakamuva ayaziyo phakathi kwengane yakhe noMnu Khumalo. Uveze ukuthi ufisa nokufa ngenxa yobuhlungu abuzwile kubulawa indodakazi yakhe.
“Lo mfana kuthiwa ubefika njalo kwami ngezikhathi zakusihlwa, athathe ingane yami ahambe nayo kuthi uma umkami ekhuluma, amlwise. Kukaningi ngizama ukuhlangana naye lo mfana engibalekela kanti izinhloso zakhe ngezokuba angizwise ubuhlungu emhlabeni,” kusho uMnu Ngema.
Uthi indodakazi yakhe ibibikile kunina ngesikhathi ihamba, yathi isayolanda imali yokuthengela abantwana izimpahla zokugqoka kubo kaMnu Khumalo.
ILANGA lithole ukuthi uNkz Gumede ubatshelile nabangani bakhe bakomakhelwane ukuthi uma kwenzeka edlula emhlabeni, kuyobe ubulewe yisoka lakhe ngoba kababoni ngaso linye.
Kuthiwa uMnu Khumalo ubelala endlini naso isidumbu singaphansi kombhede.
Umthombo weLANGA osondelene nalolu daba, uthi kuhlatshwe umkhosi emuva kokunyamalala kukaNkz Gumede kwazise isoka lakhe beliphika lithi kalimazi.
“Kuphunyiwe kwabhekwa yonke indawo kwaze kwangenwa nasendlini yalo mfana. Kuzwakale iphunga elingelihle endlini saphakamisa umbhede kwavela isidumbu sesithanda ukonakala,” kusho umthombo.
Umphakathi waseMtubatuba ukhuza ibhadi uthi kayikaze yenzeke into efana nalena endaweni.
Okhulumela amaphoyisa KwaZulu-Natal, uLt uColonel Thulani Zwane, usiqinisekisile isigameko wathi umsolwa uboshiwe.
UMnu Khumalo uvelile eNkantolo yeMantshi yaKwaMsane ngoLwesihlanu.
Kwenzeka lokhu nje, kukhalwa nkalo zonke ngokubulawa kwabantu besifazane eNingizimu Afrika.