ABAZALI BAVUKWE WUSINGA NGECWECWE
BAVUKWE wusinga abazali bakaDumi Mkokstad ngesikhathi lesi sihlabani somculo wokholo sethula icwecwe elisha.
UMdumiseni Ndzimande odume ngelikaDumi Mkoktad, wethule ngokusemthethweni icwecwe leshumi, elisihloko sithi “Egameni likaJesu”. Lo mcimbi ububanjelwe esontweni likaMbhishobhi Vusi Dube, EThekwini Community Church ngoLwesihlanu ebusuku.
Uhlelo beluphethwe nguSiya Mhlongo woKhozi FM. UDumi bekungokokuqala ngqa enza umcimbi walolu hlobo kanti ubememe nomndeni wakhe. Uyise uFalithenjwa Nzimande uthe uDumi ubevele eyingane eyehlukile kwezinye.
Utshele leli phephandaba ukuthi ngendlela abekhala ngayo esemncane bekungathi uzoshona. "Indlela abekhala ngayo ngangithi mhlawumbe kukhona okungalungile ngaye. Yimina engimqambe igama elithi Mdumiseni, ngangingazi ukuthi uzogcina elilandela leli gama," kusho uyise.
Uchaze uDumi njengomuntu okholwayo futhi oyisibusiso empilweni yakhe. "UNkulunkulu ungibusisile ngalo mntwana. Njalo uma ngimuzwa ecula inhliziyo yami iyajabula nomoya wami ukhululeke. Akukho angangijabulisi ngakho njengomzali," kusho uyise.
Unina kaDumi, uDudu, uthe: "Ufuze thina ngokucula futhi simkhulise ngawo umculo. Elakhe ikhono lokucula ledlulele ngoba ukucula ukuqale engakakwazi nokukhuluma. Eneminyaka eli-10 ukhiphe icwecwe lakhe lokuqala.
"Isikole usiqede esevele esixuba nomculo," kuchaza unina. Uthi ngenxa yokuthi bebengafuni ukumbambezela basheshe bamdedela ukuba ayozama inhlanhla eGoli.
"Uke wahlala eGoli ezama indaba yomculo kwangalunga sagcina simlanda. Ngaleso sikhathi ubesemncane kakhulu. Siphinde samdedela ngoba besingafuni ukuba ikhono lakhe lishabalale kanjalo.
"Ziningi nezinkinga abehlangana nazo kule mboni, ngokwethu bese sililahlile ithemba kodwa sambona esephumelela," enaba. Umcimbi uqale ngokuba uDumi athandazelwe ngabefundisi bebandla lakhe, iPower of God Assemblies, maqede wagonwa nguyise.
"Okwenzeka namhlanje (ngoLwesihlanu) kuyingqophamlando empilweni yami. Bekungelula kodwa ngibe nenhlanhla ngathola ukwesekwa ngabantu abaningi. Ngithanda ukubonga bonke abantu abenze lo msebenzi waba yimpumelelo," kusho uDumi.
Uthe esengena esiteji kwachwaza indlu yonke. Ufike waqhulula amanoni akwi-album yakhe entsha. Uphinde wabiza abangani bakhe, uBetusile Mcinga noJumbo Nyangiwe ukuba bazomlekelela. Ucule waze waculela noHlengiwe Mhlaba obegubha usuku lokuzalwa.
Leli cwecwe lithengwa ubuthaphuthaphu njengoba nabantu bebezicula zonke izingoma ezikulona. Phakathi kwabaculi abebekhona nguThobekile Mkhwanazi, uThinah Zungu, Abathandwa, uThulani Ga Ndlela, Sgwili Zuma, Abanqobi nabanye.
Kungene uThinah kwachwaza wahalalisela uDumi wathi: "Ngiyajabula ukuba yingxenye yalo mcimbi. Ukwethulwa kwale album kusho ukuqala kwezinto ezintsha, kusho ukukhula kule ndima esikuyona.
"Lokhu ngikufanisa nosuku lokuzalwa, lapho kuqala khona zonke izinto. Yingakho ngikukhuthaza ukuba ungayeki," kukhuthaza uThinah.