SEHLISIWE ISIBALO SAMATHIKITHI OGU
SEHLISIWE isibalo samathikithi azodayiswa emcimbini woGu Jazz Festival kulo nyaka.
Lokhu kuvele esithangamini sabezindaba ngeledlule, eRiverside Hotel, eThekwini, lapho bekudalulwa ibanga eselihanjiwe ngokuhlela lo mcimbi ozoba ngomhlaka-24 kwephezulu, eSport and Leisure, ePort Shepstone, ogwini oluseningizimu neKwaZulu Natal.
USiya Msomi weCyassound Holdings, ehlela lo mcimbi, utshele abezindaba ukuthi nonyaka isibalo samathikithi azodayiswa azoba ngu-12 000 nje kuphela okuhlanganisa nawezicukuthwane.
Uveze ukuthi nakuba lesi sibalo sisincane kuneminyaka eyedlule, kodwa uveze ukuthi yisona abafuna ukusebenza ngaso kwazise bazokwazi ukusilawula umcimbi uhambe ngohlelo.
“Asifuni kube khona isiminyaminya abantu baze bangakwazi nokujabula kahle kanti ngalesi sibalo sizokwazi ukuqinisekisa ukuthi abantu bayajabula ngendlela ehlelekile,” kusho uMsomi.
Ugqugquzela abantu ukuba basheshe bawathenge amathikithi ngoba ngeke beqe kulesi sibalo nangephutha. Uphinde waveza nokuthi zikhona nezindawo abazivulile zokupaka izimoto ezisondelene naseSport and Leisure lapho kuzobe kwenzelwa khona umcimbi.
Kulo nyaka kuboshelwe abaculi abanohlonze okubalwa kubona u-Amanda Black, Ringo Madlingozi, Jimmy Dludlu, Sjava, Mondli Ngcobo, Naima Kay, Sands, Mbuso Khoza, Tender Mavundla, Zakes Bantwini nabaningi. Kuzobe kukhona noDJ okubalwa uMuntu (Master Blaster), Masheddys noSiyanda.
Kulo nyaka kuzophinde kube nehora eliyisipesheli lapho kuzonikezwa khona ithuba abaculi abaqhamuka ngaphansi kwesifunda Ugu. UMsomi uveze ukuthi laba baculi baqokwe ngemuva komzungezo wenhlolokhono abawenze komasipala abangaphansi koGu District.
Minyaka yonke lo mcimbi udonsa izinkumbi zabantu abaqhamuka ezinkalweni ezahlukene zakuleli.