Usuqalile owokuheha abantu kwiFact Durban Rocks
UVUNGUZE eGoli umoya weFact Durban Rocks njengoba inkampani ehlela lo mcimbi, i-Afrotainment, ibiqhuba umjikelezo wokuheha abantu ukuba baphume ngobuningi ngomhla lulunye kuNtulikazi (July).
Umcimbi weFact Durban Rocks usuzakhele igama elihle njengoba wenzeka ngempelasonto yeVodacom Durban July kanti udonsa izinkumbi zabathandi bobumnandi ezindaweni ezahlukene eNingizimu Afrika njengoba ubanjelwa ePeople's Park, eMoses Mabhida Stadium, eThekwini.
NgoMgqibelo abathandi bobumnandi abazinze eGoli babuthane endaweni yokujuxuza esezingeni, iTaboo Night Club, eSandton, lapho bekuboshelwe khona abaculi noDJ abehlukene emcimbini obizwa ngeRoad To Fact Durban Rocks.
Phakathi kwabanandisile kulo mcimbi kubalwa uDJ Tira, uGukwa, u-Emza, uTipcee, uBenny Maverick, uKwesta, uNaak Musiq, uDJ Fisherman, uPrince Bula nabanye.
Lo mcimbi ubuhanjelwe nangamaciko abezokweseka i-Afrotainment anganandisanga okubalwa kuwona uDonald, uProfessor, uChynaman, uStilo Magolide, uPhila Madlingozi nabanye.
UDJ Tira wenze adume ngakho eklwebha amapuleti abantu bajuxuza sengathi kabanamathambo. Kulo mcimbi kuphinde kwamenyezelwa nohlu lwabaculi abazonandisa kwiFact Durban Rocks njengoba kuboshelwe okubalwa kubona, u-AKA, uCassper Nyovest, uBabes Wodumo, uSphectacular noNaives, uRiky Rick, u-Okmalumkoolkat, iBig NUZ, yiBlack Motion, uKwesta, uDJ Shimza, UPrince Kaybee, DJ Cleo, uCndo, uCuloe De Song nabaningi. UTira unxuse abantu ukuba basheshe bawathenge amathikithi njengoba edayisa okwamagwinya ashisayo e- computickets.