Okumele ukugweme uma une-gout
NAMUHLA sibheka inkinga ye-gout okuwuhlobo oluthile lwesifo samathambo, i-arthritis. Lesi sifo sivame ukuphatha abesilisa, esimphethe ufikelwa isigubhukane wubuhlungu obuvuthayo, wukuqina nokuvuvukala kwamalunga omzimba - imvamisa kubhozo. Lobu buhlungu bubuya buphindelela aze elashwe lowo ogulayo. Ngokuhamba kwesikhathi, i-gout ingawalimaza amalunga, imisipha nezinye izicubu emzimbeni.
YINI IMBANGELA YE-GOUT?
Imbangela ye- gout yi- uric acid eningi egazini. Abanye abantu abane-uric acid eningi kuyenzeka bangabi nayo i- gout kodwa uma umthamo wayo egazini usuweqile, iba yizinhlayiya eziqinile lapha emalungeni.
Uba sengcupheni yokungenwa yilesi sifo umuntu ozimukile, ophuza utshwala ngokweqile noma odla inyama yenkomo nenhlanzi ngokweqile. Eminye imishanguzo echamisa njalo, ikakhulukazi leyo yokwehlisa umfutho wegazi ophezulu ( high blood pre
ssure) nevamise ukubizwa ngewater pills, nayo ingaba yimbangela ye- gout.
IZIMPAWU ZE-GOUT
Izimpawu ezivamile wukuvuvukala, wukuthamba, umbala obomvu nobuhlungu obuhlabayo kubhozo. Iyahlasela futhi ezinyaweni, emaqakaleni emadolweni nakwamanye amalunga omzimba.
Ubuhlungu buthatha izinsuku ezimbalwa kokunye kuze kudlule amasonto amaningi ngaphambi kokuba budambe.
Ubuhlungu ku-yenzeka buphinde bubuye emuva kwezinyanga noma emuva konyaka. Bonana nodokotela wakho ngisho ubuhlungu sebudlulile.
Ukunqwabelana kwe- acid ebikudalele i- gout ekuqaleni, kungawalimaza amalunga omzimba wakho. Udokotela wakho ukubuza imibuzo ngokuzwayo emzimbeni bese ekuhlola. Kungenzeka athathe isampula loketshezi emalungeni omzimba ukuze abone ukuthi sezakhekile yini izinhlayiya ze- acid. Lena yindlela engcono kakhulu yokuhlola ukuthi i- gout ikhona noma qha.
Udokotela angahlola igazi ukuze athole isilinganiso somthamo weacid egazini.
IHLONZWA KANJANI I-GOUT? YELASHWA KANJANI?
Ukuze kunqandwe i- gout, udokotela angakunikeza umjovo we- corti
costeroids noma akubhalele uhlu lwemithi ozoyisebenzisa nsuku zonke. Leyo mithi siyancishiswa isili-nganiso sayo lapho izimpawu ziya ngokuya zincipha. Izinhlungu ziyancipha esikhathini esiwusuku uma ukwelashwa kusheshe kwaqala.
Uma ziqala izinhlungu zokuhlasela kwe- gout, phumuza lelo lunga lapho ikuphethe khona.
Imishanguzo enjenge- ibuprofen, ingalekelela ukuba uzizwe usungcono. Qaphela ukuba ungayisebenzisi imishanguzo ene- aspirin ngoba yenyusa umthamo we- acid egazini.
Ukuze uvimbele ukuhlaselwa yigout, udokotela angakubhalela uhlu lwemithi ezonciphisa ukunqwabelana kwe- acid egazini. Kuyasiza futhi ukuqaphela uhlobo lokudla okudlayo ukuze unqande lesi sifo. Yidla okulingene okuhle ukuze uvimbele ukuzimuka ngokweqile futhi uthole izakhamzimba ezifanele. Nciphisa isilinganiso senyama ngosuku - kubalwa neyezilwane zasolwandle - notshwala, ikakhulukazi ubhiya. Phuza kakhulu amanzi nezinye iziphuzo.
Umyalezo ucacile, makunciphe ukuba sebandleni lezoso mihla namalanga. Umthombo ngabe:webmd.com