UMAMATHEKELANI BEBHEDA IGAMA LAKHO?
HHAYI sengehlulekile wukuzibamba. Ake nitshele mina ngitshele abelungu, laba bantu ababhikishela ukuba kuxoshwe ingane emhlophe efunda ePietermaritzburg Girls High School ngoba ithuke izingane ezimpisholo yazibiza ngama-carefools, kabasebenzi yini noma babhorekile or bafuna ukubukwa?
Babhikishela ukuba kuxoshwe le ngane ngoba ibize ezimpisholo ngama-carefools kwazise zihluleka wukupela igama layo! Ya nazo-ke, wumshubo! Ngangithini? Niyabona-ke ukuthi abanye abantu bazinaka kanjani izinto zabo? Kangisho ukuthi ingane i-right ngalokhu ekushilo ngoba nami ngiyizwile ukuthi igcwele inzondo - wena owabona i-Israel izonda amaSulumane asePalestine kodwa iyasilaya ngoba thina sifana ncimishi nolamthuthu obuvalelwe emotweni kaRafique laphaya KwaMadekazi - okuthi noma usuthengwe ngumama uNtongolozi wawubeka egcekeni, wona uvele ucabange ukuthi usavalelwe emotweni.
Lezi zingane zibiza izingane zethu ngama-stomuchy words, o-carefools nje, zona kazikwazi ngisho ukuthi ikati. Ngike ngabhala eminyakeni eyisi-8 edlule ukuthi bengiyolanda isitifiketi sendodakazi yami - sokwenza kahle ezifundweni zayo - isafunda e-primary, othisha bayo bebiza oSiphesihle ngoSshiphesshishle, oNhlakanipho kungoNsh-hlakanipo, akekho umuntu okhonondile lapho. NgoMgqibelo kusihlwa, kangilalanga ngibuka isibhakela kulwa uJohnny “The Hurricane” Muller engqimuzwa nguThabiso “The Rock” Mchunu.
Ubungezwa abasakazi besiNgisi no-ring announcer, uMchunu bebethi M-tshunu uSimphiwe Khonco bekunguSimphiwe Khonkho - ngivele ngabona ukuthi isigcino uzokuba nguMakhokho. Akekho umuntu oke wathi vu. Ezinye izizwe zijwayezwa yinina ukuba zinikhwele emakhanda bese nilokhu niyoshaya amatoyitoyi angathi shu la.
Thina bantu abampisholo sinomkhuba omubi, ofana nobhejane odiniwe, kuke kuthi omunye umuntu wolunye uhlanga ebheda igama lakho, umamatheke uthi: “Uyazama yena bandla shame.” Ake ubhede elakhe, uzokutshela ngqo ezimpempeni ukuthi: “Kangiyena uMikhayeli mina nginguMayikheli.”
Thina nje esisebenza ngokubhala, umuntu wakini omnyama ohlala KwaMchunu-Natal, uke akuthumelele incwadi eya kumhleli noma ecela usizo bese efuna ukuba ubone ukuthi yena ufunde waze wayofika eCambridge Foods University le e-England, akubhalele isiNgisi esidida uTheresa May, undunankulu wase-England.
Ezansi uthi uyabheka nguSibusiso Dlamini, eMatholonjeni, KwaDlangezwa, eMpangeni.
Ningixolele-ke mina wasemaChunwini, ngivele ngiyibuke leyo nto ngiyithathe ngiyibeke laphaya. Nabo laba abangasazi isiNguni kodwa bezalelwe KwaMchunu-Natal kangiyingeni nje indaba yabo noma ngabe bamhlophe, ba-yellow or ba-green.
Ngeke ufike e-England ukhulume isiZulu ucabange ukuthi kukhona umuntu ozokuphendula, yingoba amaNgisi ayenza ngenhloso le nto yokuthi ulimi lwawo alugqishe kuzona zonke izizwe, ayenzela ukuba wona aqhiphotheke angazifundi ezabanye abantu.
Uma ezinye izizwe sezinithukela ukubheda amagama azo, niyakhohlwa ukuthi zidudwa yinina. Ngisho iminyango kahulumeni lapha KwaMchunu-Natal, iyazi kahle kamhlophe ukuthi kunamaphephandaba abhala ngesiZulu kodwa izitatimende azithumela ngesikhulu isiNgisi lesi, ukube besingamanzi besingagcwala uThukela - hhayi iTugela River zikhulu zikahulumeni.
Uzwe abantu bethi hhayi phela isiNgisi wulimi lokuxhumana, kusho bani? IsiShangane, isiZulu, isiXhosa, isi-Igbo, isiNyanja njalo njalo kube yizilimi zani? Zokuhlobisa e-museum? Nakuyona le mibhikisho, kubhikishwa ngesiNgisi! “#FeesMustFall!” “#ZumaMustGo.” “#RevMkhekheleziMustStay!”
Uke ubone uma ubuka izindaba kwaSABC 1, uma umuntu ekhuluma iseTswana ezindabeni zesiZulu, kutolikwa ngesiNgisi kodwa okhuluma ngesiNgisi kungatolikwa - kodwa kuthiwa yizindaba zesiNguni.
Kakushiwo ngani ukuthi yizindaba zesiNgisi kodwa kudatshukelwa abeNguni ngazo? Mina nje wasemaChunwini ngeke ngibhikishele imbudane, into edalwe yimina ngqo! Kuphela nje uma ingane ithuke eyami ngala mazwi abolile, iyokubona okwabonwa nguSawuli waze wa-disguiser wazibiza ngoPawuli. Impande ngiyayazi impela - ngingakuthakela ngisho umuthi wokuba udlule abantu bangakuboni - kodwa ngeke ngiyiloye, ngiyosho ngomlomo nje ukuthi itshele abazali bayo balibambe lingashoni ngoba uma like lashona kuyovuka uBaba Yaga umthakathi wodumo emazweni angamaSlav - okubalwa kuwona iRussia, iBelarus, i-Ukraine, iPoland etc.
Izingane ziyifundiswa ngabazali bazo le nto yokucwasa, kayikho ingane ezalwa iyi-professional cwasa, ungangibuza ungiphale i-tongue - ngiyesaba ukuthi ulimi ngoba uLimi ngumkhulu waseCukwaneni kwaMkhwanazi le ngakithi KwaDlangezwa. Hikhensilengopfuma-Afrika !