Kuhle okwenziwe yiSAB kwi-netball
YIZE singakugqugquzeli ukudliwa kwamanzi amponjwana, ikakhulukazi okusuke sekuhambisana nokuba umuntu adakwe aze abhuquze, kuphele nemali yokondla umndeni kodwa sithi masiyishayele ihlombe iSouth African Breweries (SAB) ngokuxhasa umdlalo webhola lomnqakiswano (netball) isebenzisa umkhiqizo wayo oqale ukungenisa ngowezi-2002, iBrutal Fruit.
Masikugcizelele ukuthi abantu mabangabuphuzi utshwala sengathi umhlaba usuyabhubha kusasa futhi phansi ngokushayela uphuzile! Okwenziwe yiBrutal Fruit kwenza sibe nethemba lokuthi iNingizimu Afrika izogcina isingumakhonya kwezebhola lomnqakiswano emhlabeni. Kusukela ngowezi-2014 iBrutal Fruit ixhase iligi yamaqembu ali-10 ezinga elithanda ukuba phezulu le-netball - okuyinto ebesiyizwa ngendaba kuleli. Kuyaziwa ukuthi i-netball wumdlalo ohamba phambili emantombazaneni ampisholo ezikoleni kodwa bekuthulekile nje ngawo kwaze kwagcina ngokuba ezinye izikole ziwushaye indiva.
Njengoba isivumelwano seBrutal Fruit neNetball South Africa (NSA), eholwa nguMimi Mthethwa ongumengameli siphela ngowezi-2019, siyafisa ukuba kungabe sekuphela kanjalo ngale ligi. Siyafisa ukuba iqhubeke iBrutal Fruit nokweseka lo mdlalo, nezinye izinkampani ziphonse esivivaneni. Sibonga nabakwaSuperSport ngokuyisakaza bukhoma imidlalo yale ligi, okwenza namantombazanyana asakhula abone ukuthi hhiya, i-netball sekuwumdlalo ngempela asengabamba iqhaza kuwona.
Lokhu sinethemba lokuthi kuyasiza nasekubeni izingane zingabi wuvanzi futhi zihlale ziyimiqemane ngoba kuyajinywa laphayana kakudlalwa.
Yize-ke iqembu laKwaZulu-Natal, iKingdom Stars, izinto zingalihambelanga kahle kule sizini eqale ngoMbasa (April) yaphela izolo ngeSonto ngomdlalo wamanqamu phakathi kweGauteng Jaguars neNorth West Flames, eMangaung Outdoor Sports Centre, eBloemfontein, kodwa likhona ithemba lokuthi lezi zintokazi zizohamba zenze kahle. Siyayinxusa nemiphakathi ukuba ingagcini nje ngokujabulela ukuthi izingane zawo zidlala lo mdlalo kodwa mayiye ezinkundleni iyobukela izintokazi zigadulisana.
Siyafisa futhi nokuba le midlalo igijinyelwe emalokishini isikhathi esiningi kwazise kuyaziwa ukuthi iningi labantu abampisholo lidla imbuya ngothi, kunzima ukugibela liye emadolobheni liyobuka imidlalo. Nabo abadlali kubalulekile ukuba baziphathe ngendlela edingekayo kumdlali ukuze phela lo mdlalo ungagcini usuduma kabi, okungenza ukuba nabaxhasi abafana neBrutal Fruit bahoshe izinyawo.
Phela kayikho inkampani efisa ukumataniswa nabantu abenza izinto eziyichilo. Sinxusa nemiphakathi ukuba igqugquzele amaqembu alo mdlalo ezindaweni zawo kwazise isike yankankanywa eyokuba ufakwe nakuma-Olympic Game - yize kubukeka kusenzima ngenxa yokuthi emazweni amaningi usathathwa njengowama-amesha.
Okwenziwe yiBrutal Fruit neSuperSport eNingizimu Afrika, siyacabanga ukuthi kuzothumela umyalezo nasezinkampanini zakwamanye amazwe ase-Afrika bese zeseka lo mdlalo. Sinethemba lokuthi ngenxa yokwesekwa ngendlela efanele kwawo eNingizimu Afrika, iqembu lesizwe lizokhiqizelwa ukhilimu wabadlali ongamelana ngisho nanoma yisiphi isimo enkundleni.
Siyanxusa ukuba nomnyango wezemidlalo ungahambeli kude nalo mdlalo, ungaqhamuki kuphela nje uma sekukhona okuhle osekuvelile noma ugxilise umqondo wawo emidlalweni enedumela njengonobhutshuzwayo nombhoxo nje kuphela.
I-netball nayo iwumdlalo obalulekile ongasiza ekubeni amadodakazi akuleli angazizwa eshiywe ngaphandle kwezemidlalo - njengoba kwenzeka kwiBanyana Banyana ephathwa ngokwezinga eliphansi ngokumangalisayo uma kuqhathaniswa neBafana Bafana.
Okubi nje yikhona ukuthi abanye abadlali be-netball baye baphazamiseke bangabi yingxenye yemidlalo ngenxa yokuthi phela i-netball kayikho ezingeni likanobhutshuzwayo, umbhoxo, ikhilikithi neminye imidlalo kuleli, bayitoho kuyona, banemisebenzi yabo ebaholelayo.
Uma nje, izinkampani, uhulumeni nomphakathi wonke waseNingizimu Afrika bengabambisana, sinethemba lokuthi i-netball ingagcina isiwumsebenzi oholela nyanga zonke kubadlali bayo - njengoba kwenzeka kweminye imidlalo.